காரைக்குடி: காரைக்குடியில் உள்ள அம்மன் கோயில்களில், ஆடி வெள்ளியான இன்று பக்தர்கள் கூட்டம் அலைமோதியது.

ஆடி மாதம் அம்மனுக்கு உகந்த மாதமாக கருதப்படுகிறது. ஆடிமாதத்தில் வரக்கூடிய செவ்வாய் மற்றும் வெள்ளிக்கிழமைகளில் பக்தர்கள் கூட்டம் அதிக அளவில் காணப்படும். தற்போது ஆடி மாதம் தொடங்கியதையடுத்து முதல் ஆடிவெள்ளியான இன்று ஏராளமான பக்தர்கள் அம்மன் கோயில்களில் சாமி தரிசனம் செய்தனர். கோயில்களில் பக்தர்கள் பொங்கல் வைத்தும், கூழ் ஊற்றியும் நேர்த்திக்கடன் செலுத்தினர். காரைக்குடியில் உள்ள மீனாட்சிபுரம் முத்துமாரியம்மன், கொப்புடையநாயகி அம்மன், கொல்லங்காளியம்மன், கணேசபுரம் மாரியம்மன் உள்ளிட்ட பல்வேறு கோயில்களிலும் அம்மனுக்கு சிறப்பு அபிஷேகம், ஆராதனைகளும், சிறப்பு திருவிளக்கு பூஜையும் நடந்தது.