பழநி: பழநி, மலை கோயில் நிர்வாகத்தின் உப கோயிலான பெரியநாயகி அம்மன் கோவிலில் நவராத்திரி விழா காப்புகட்டுதலுடன் துவங்கியது.

பழநி, மலைக்கோயில் நிர்வாகத்தின் உப கோயிலான கிழக்கு ரத வீதியில் உள்ள பெரிய நாயகி அம்மன் கோவிலில் நேற்று நவராத்திரி விழா துவங்கியது. இதில் முதல் நிகழ்ச்சியாக சுவாமிகளுக்கு காப்பு கட்டுதல் நிகழ்ச்சி நடைபெற்றது. நேற்று காலையில் பெரிய நாயகி அம்மன் கோயிலில் மூலவர்,மயில் வாகனம், கோயில் யானை கஸ்தூரிக்கு காப்பு கட்டப்பட்டது. திருஆவினன்குடி சுவாமிக்கு காப்பு கட்டினர். மலைக்கோயிலில் உச்சிக்கால பூஜைக்கு பின் மூலவர், சண்முகர், வள்ளி, தேவயானை, துவாரபாலகர், மயில் வாகனம், நவவீரர்கள் ஆகியவற்றிற்கு அமிர்தலிங்கம் குருக்கள், செல்வசுப்ரமண்ய குருக்கள் காப்பு கட்டினர். அக்., 4ல் மலைக்கோயிலில் பகல் 1:30 மணிக்கு சாயரட்சை பூஜை நடைபெறும். பராசத்தி வேல் புறப்பட்டு மலைக்கோயில் சன்னதி திருக்காப்பிடப்படும். பெரியநாயகி அம்மன் கோயிலில் இருந்து வேலுடன் தங்க குதிரை வாகனத்தில் முத்துகுமாரசுவாமி எழுந்தருளி கோதைமங்கலத்தில் அம்பு போடுதல் நிகழ்வில் சூரன் வதம் நடைபெறும். அதன்பின் பராசக்தி வேல் மலைக்கோயில் அடைந்த பின் அர்த்த சாம பூஜை நடைபெறும். நிகழ்ச்சி ஏற்பாடுகள் இணை ஆணையர் நடராஜன் தலைமையில் நடைபெறும். நவராத்திரி விழாவில் மாலை 6:00 மணிக்கு பெரிய நாயகி அம்மன் கோவிலில் சிறப்பு அபிஷேகம், அலங்காரம் நடைபெறும். விழாவில், பக்தி இசை, சொற்பொழிவு, நாட்டியம் உள்ளிட்ட நிகழ்ச்சிகள் நடைபெறும்.