செஞ்சி: மேல்மலையனுார் அங்காளம்மன் கோவிலில் நேற்று முன் தினம் நடந்த ஐப்பசி மாத அமாவாசை ஊஞ்சல் உற்சவத்தில் சூரிய கிரகணம் காரணமாக பக்தர்கள் வருகை குறைந்து காணப்பட்டது.

விழுப்புரம் மாவட்டம் மேல்மலையனுார் அங்காளம்மன் கோவிலில் நேற்று முன்தினம் இரவு ஐப்பசி மாத அமாவாசை ஊஞ்சல் உற்சவம் நடந்தது. அன்று காலை 4 மணிக்கு அம்மனுக்கு சிறப்பு அபிஷேகம், தங்க கவச அலங்காரம், விசேஷ அர்ச்சனை நடந்தது. இரவு 11மணிக்கு உற்சவர் அங்காளம்மன் அன்னபூரணி அலங்காரத்தில் மலர்களால் அலங்கரித்திருந்த ஊஞ்சல் மண்டபத்தில் எழுந்தருளினார். கூடியிருந்த ஆயிரக்கணக்கான பக்தர்கள் கற்பூரதீபமேற்றி வழிபட்டனர். பூசாரிகளும், பக்தர்களும் அம்மன் பக்தி, தாலாட்டு பாடல்களை பாடினர். இதில் விழுப்புரம் கலெக்டர் மோகன், எஸ்.பி., ஸ்ரீநாதா, சப்கலெக்டர் கட்டா ரவி ஜேஜா, இந்து சமய அறநிலையத்துறை உதவி ஆணையர் ஜீவானந்தம் அறங்காவலர் குழு தலைவர் சந்தானம் மற்றும் அறங்காவலர்கள், கோவில் ஊழியர்கள் கலந்து கொண்டனர். இந்த மாதம் அமாவாசை 24, 25 என இரண்டு நாட்கள் இருந்ததால் ஒரு பகுதி பக்தர்கள் 24ம் தேதி அன்றே சாமி தரிசனம் செய்தனர், நேற்று முன்தினம் சூரிய கிரகணம் காரணமாக கோவில் நடை 4 மணி முதல் 7 மணி வரை சாத்தியிருந்தனர். அத்துடன் வெளியூர்களில் இருந்து குறைவான பஸ்களையே இயக்கினர். இதனால் பக்தர்கள் வருகை வழக்கத்தை விட பாதியாக குறைந்தது.