திருப்போரூர் : திருப்போரூர், கந்தசுவாமி கோவில் பொங்கலை ஒட்டி, 1,008 பால்குட விழா, நேற்று முன்தினம் கோலாகலமாக நடந்தது. திருப்போரூர் கந்தசுவாமி கோவிலில் ஆண்டுதோறும் பொங்கல் பால்குட விழா கந்தன் வழிபாட்டு மன்றத்தினர் மூலம் நடத்தப்படுகிறது. அந்த வகையில், இந்தாண்டு 32 ம் ஆண்டு பால் குட விழா நேற்று முன்தினம் கோலாகலமாக நடந்தது. திருப்போரூர் கந்தசுவாமி கோவில், சரவண பொய்கையை ஒட்டிய காவடி மண்டபத்திலிருந்து, 1,000க்கும் மேற்பட்ட பக்தர்கள், பால்குடங்களை ஏந்தி, மாடவீதியில் கிரிவலம் வந்தனர். பால் குடங்களுடன் காவடி அணிவகுப்பும் நடந்தது. பகல் 12:30 மணிக்கு பக்தர்கள் கந்தசுவாமி கோவிலில் வந்தடைந்தனர். கந்தசுவாமி கோவில் உற்சவருக்கு பால் குடங்களால் பால் அபிஷேகம் நடந்தது. பொங்கல் திருநாளில், வழிபாட்டு மன்றத்தினர் கந்தனை வழிபட குடும்பத்துடன் குவிந்திருந்தனர்.