பழநி: பழநி முருகன் கோயிலுக்கு கோவை மாவட்டம் வால்பாறையை சேர்ந்த பக்தர்கள் பறவைக்காவடி எடுத்து வந்தனர்.

பழநி முருகன் கோயிலில் தைப்பூச திருவிழா நிறைவு பெற்ற பிறகும் ஏராளமான பக்தர்கள் பாதயாத்திரையாக காவடி எடுத்து வருகை புரிகின்றனர். நேற்று (பிப்.23) கோவை மாவட்டம், வால்பாறையை சேர்ந்த ஆயிரக்கணக்கான பக்தர்கள் நான்கு நாட்கள் பாதயாத்திரையாக சுவாமி தரிசனம் செய்ய வந்தனர். நேற்று முன்தினம் இரவு பழநி, சண்முக நதி வந்தனர். நேற்று சண்முக நதியில் வழிபாடு செய்து ராட்சத கிரேனில் 9 நபர்கள், பறவைக்காவடியில் அந்தரத்தில் தொங்கியபடி புறப்பட்டனர். பறவை காவடி முன்பாக 15 பேர், 15 அடி நீளமுள்ள அலகு குத்தியும், 5 பேர் பறவை கத்திகளால் அலகு குத்திய படியும் சென்றனர். இவர்கள் கடந்த 47 ஆண்டுகளாக பால்காவடி, தீர்த்த காவடி, மயில் காவடி எடுத்து வருகின்றனர். பறவை காவடி எடுத்து, அலகு குத்தி வந்தவர்களிடம் பெண்கள் தங்கள் குழந்தையை கொடுத்தனர். நகரின் முக்கிய வீதிகளில் வந்து கிரிவலப் பாதையில் வலம் வந்தனர். மலைக் கோயிலில் தரிசனம் செய்து திரும்பினர்.