காஞ்சிபுரம்: காஞ்சிபுரம் காமாட்சி அம்மன் கோவிலில் விஸ்வரூபம் தரிசனம் நடைபெற்றது.

காஞ்சிபுரம் காமாட்சி அம்மன் கோவில் பிரமோற்சவம் கடந்த மாதம், 25ம் தேதி துவங்கியது. 10 நாட்கள் நடந்த இத்திருவிழாவில் நேற்று இரவு தங்க காமகோடி விமானத்தில் அம்மன் எழுந்தருளி, வீதியுலா சென்று பக்தர்களுக்கு அருள்பாலித்தார். திருவிழா நேற்றுடன் நிறைவு பெற்றது. இன்று காலை விஸ்வரூப தரிசனம் நடைபெற்றது. இத்திருவிழாவில் அம்மன் தினசரி காலை, இரவு வேளைகளில் பல்வேறு வாகனங்களில் எழுந்தருளி வீதியுலா நடந்தது. விழாவில் முக்கிய நிகழ்ச்சியாக மூன்றாம் நாள் அம்மன் தங்க சிம்ம வாகனத்தில் எழுந்தருளினார். மறுநாள் தங்க சூரிய பிரபை வாகனத்தில் சென்று பக்தர்களுக்கு அருள்பாலித்தார்.நேற்று முன்தினம் இரவு மின் விளக்குகளால் அலங்கரிக்கப்பட்ட வெள்ளி ரதத்தில் அம்மன் எழுந்தருளி நான்கு ராஜவீதிகளில் வீதியுலா சென்று பக்தர்களுக்கு அருள்பாலித்தார். இவ்விழாவில் ஏராளமான பக்தர்கள் கலந்து கொண்டு தரிசனம் செய்தனர். நேற்று இரவு அம்மன் தங்க காமகோடி விமானத்தில் எழுந்தருளி வீதியுலா நடந்தது. இன்று காலை 5:00 மணி முதல் அம்மன் விஸ்வரூபம் தரிசனம் நடைபெற்றது.