கமுதி: கமுதி அருகே செங்கப்படை கிராமத்தில் அழகுவள்ளி அம்மன் கோயில் ஆவணி பொங்கல் மற்றும் முளைப்பாரி விழா கொடியேற்றத்துடன் தொடங்கியது. இதனை முன்னிட்டு கிராமத்தின் முக்கிய வீதிகளில் பொதுமக்கள் மஞ்சள் நீர் சுமந்து கொடிமரத்தில் ஏற்றப்பட வேண்டிய அம்மன் உருவம் பொறித்த கொடியை ஊர்வலமாக கோயிலுக்கு கொண்டு வந்தனர். கணபதி ஹோமம், யாகசாலை பூஜை நடந்தது. மூலவரான அழகுவள்ளி அம்மன் மற்றும் கொடிமரத்திற்கு பால்,சந்தனம், மஞ்சள் உட்பட 16 வகையான அபிஷேகம் நடந்தது. கொடிமரத்தில் அம்மன் உருவம் பொறித்த கொடியேற்றப்பட்டது. 500க்கும் மேற்பட்ட பக்தர்கள் காப்பு கட்டினர். தினந்தோறும் அம்மனுக்கு சிறப்புபூஜை, அபிஷேகம் நடைபெறும்.செப்., 13ல் பால்குடம், அக்கினிசட்டி,பூக்குழி, வேல் குத்துதல்,சாக்குவேடம், சேத்தாண்டி வேடம் அணிந்து பக்தர்கள் நேர்த்திக்கடன் செலுத்தும் நிகழ்ச்சி நடைபெறும். நிகழ்ச்சிக்கான ஏற்பாடுகளை செங்கப்படை கிராமமக்கள் செய்துள்ளனர்.