திருச்சி: ஸ்ரீரங்கம் ரெங்கநாதர் கோவிலில் கிருஷ்ணர் ஜெயந்தி விழாவை முன்னிட்டு சித்திரை வீதிகளில் எண்ணெய் விளையாட்டு கண்டருளினார். தொடர்ந்து, மாலை 3 மணிக்கு நம்பெருமாள், உபயநாச்சியார்கள் மற்றும் கிருஷ்ணன் உடன் புறப்பாடு நடைபெற்றது.

ஸ்ரீரங்கம் ரெங்கநாதர் கோவிலில் ஆவணியில் கிருஷ்ணர் ஜெயந்தி விழா சிறப்பாக கொண்டாடப்படுகிறது. விழாவில் நேற்று நம்பெருமாள் திருமஞ்சனம், அமுது கண்டருளுளினார். விழாவின் இரண்டாம் நாளான இன்று (8ம் தேதி) காலை 7 மணிக்கு கிருஷ்ணன் புறப்பாடு நடைபெற்று, சித்திரை வீதிகளில் எண்ணெய் விளையாட்டு கண்டருளினார். தொடர்ந்து மாலை 3 மணிக்கு நம்பெருமாள், உபயநாச்சியார்கள் மற்றும் கிருஷ்ணன் உடன் புறப்பட்டு அம்மாமண்டபம் சாலையில் ஆஸ்தான மண்டபத்திற்கு வந்தார். அங்கு சிறப்பு பூஜை நடைபெற்றது. இன்று இரவு 8.15 மணியளவில் பாதாள கிருஷ்ணர் சன்னதி அருகில் உறியடி உற்சவம் விழா நடைபெறுகிறது. ஏற்பாடுகளை கோவில் இணை ஆணையர் மற்றும் ஊழியர்கள் செய்துள்ளனர்.