நாமக்கல்:உத்தரபிரதேச மாநிலம் பைசாபாத் நகரில் இருந்து 7 கி.மீ., தொலைவில் சரயு ஆற்றங்கரையில் அமைந்துள்ள அயோத்தியில் கட்டப்பட்டுள்ள ராமர் கோயில் கும்பாபிஷேகம் 2024 ஜன.22ல் கோலாகலமாக நடக்கிறது.

அதற்காக கர்நாடகா மாநிலம் பெங்களூருவை சேர்ந்த பக்தர் ஒருவர் கோயில் பிரகாரத்தில் ஆலய மணிகள் பொருத்த முடிவு செய்து நாமக்கல் முல்லை நகரில் உள்ள ஆண்டாள் மோல்டிங் ஒர்க்ஸ் நிறுவனத்தை அணுகியுள்ளார். அவர்கள் ஆலயமணிகள் தயாரித்து பெங்களூருவுக்கு அனுப்பி வைத்துள்ளனர்.ஸ்தபதிகள் ராஜேந்திரன், காளிதாஸ் கூறியதாவது: அயோத்தி ராமர் கோயில் பிரகாரத்தில் பொருத்துவதற்காக 108 ஆலய மணிகள் அமைக்க முடிவு செய்துள்ளனர். முதற்கட்டமாக 12 ஆலய மணிகள் தயாரித்துள்ளோம். காப்பர், வெள்ளியம், துத்தநாதம் ஆகிய மூன்று உலோகங்கள் பயன்படுத்தி ஒரு மாதத்தில் 20 பணியாளர்கள் கொண்டு இந்த மணிகள் தயாரிக்கப்பட்டுள்ளன. தற்போது 120 கிலோவில் 5 மணி, 70 கிலோவில் 6 மணி, 25 கிலோவில் ஒரு மணி மற்றும் 36 பூஜை மணிகள் தயாரிக்கப்பட்டுள்ளன. இவை அனைத்தும் 1200 கிலோ எடை கொண்டுள்ளன. முன்னதாக நாமக்கல் ஆஞ்சநேயர் கோயிலில் சிறப்பு பூஜை செய்து பெங்களூருவுக்கு கொண்டு செல்லப்படுகிறது.இவ்வாறு அவர்கள் கூறினர்.