பாலக்காடு; பாலக்காடு அருகே உள்ள புளியல் பகவதி அம்மன் கோவில் திருவிழா கோலாகலமாக நடந்தது.

கேரள மாநிலம் பாலக்காடு அருகே உள்ளது கரிங்கரைப்புள்ளி புளியல் பகவதி அம்மன் கோவில். ஆண்டில் ஒரு நாள் மட்டும் நடை திறந்து திருவிழா கொண்டாடுவது இந்த கோவில் சிறப்பு.

நடப்பாண்டு திருவிழா நேற்று கோவில் நடை திறந்ததும் ஆரம்பித்தன. பிம்பசுத்தி, மகா கணபதி ஹோமம் ஆகியவை நடந்தது. தொடர்ந்து அம்மனுக்கு அபிஷேகம் மற்றும் சிறப்பு பூஜைகள் நடந்தன. 9.30 மணிக்கு கிழக்கூட்டு அனியன் மாரார் தலைமையில் பஞ்சாரிமேளம் என்ற அழைக்கப்படும் செண்டை மேளம் முழங்க ஆடை ஆபரணங்கள் அணிந்த முத்து மணி குடைகள் சூடிய மூன்று யானைகள் அணிவகுத்து நின்ற காழ்ச் சீவேலி என்ற நிகழ்ச்சி நடைபெற்றன. மாலை 3.30 மணிக்கு கேரள பாரம்பரிய கலையான ஓட்டன்துள்ளல் நடனம் கோவில் வளாக அரங்கில் நடந்தன. 4 மணிக்கு பஞ்சவாத்தியம், குடைவாத்தியம், நாதஸ்வரம், சிங்காரி மேளம் என முழங்க அம்மன் யானை மீது எழுந்தருளி வீதி உலா வந்து பக்தர்களுக்கு அருள் பாலிக்கும் வைபவம் நடைபெற்றது. தொடர்ந்து அம்மனுக்கு தீபாராதனை நடந்தது. இன்று காலை நடந்த சிறப்பு பூஜைகளுக்கு பிறகு விழா நிறைவடைந்ததோடு கோவில் நடை மூடப்பட்டது. அம்மனை தரிசித்து வழிபட ஆயிர கணக்கான பக்தர்கள் திரண்டு வந்திருந்தன.