மேட்டுப்பாளையம்; மேட்டுப்பாளையம் அருகே உள்ள ஜடையம்பாளையத்தில் பிரசித்தி பெற்ற தென்திருப்பதி திருமலை ஸ்ரீவாரி ஆலயம் உள்ளது. இங்கு தமிழ் வருடப்பிறப்பான சித்திரை முதல் நாளை முன்னிட்டு நேற்று அதிகாலை சுப்ரபாதத்துடன் சிறப்பு வழிபாடு துவங்கியது. அதனைத்தொடர்ந்து விஸ்வரூப தரிசனம், தோமாலை, சகஸ்ர நாமார்ச்சனை, நிவேதனம், ஆர்த்தி உள்ளிட்டவையும் நடைபெற்றன. தொடர்ந்து பல்வேறு சிறப்பு அபிஷேக, அலங்காரங்களும் நடைபெற்றன. அதனைத்தொடர்ந்து மாலை ஸ்ரீமலையப்ப சுவாமி ஸ்ரீதேவி, பூதேவி தாயாருடன் அலங்கரிக்கப்பட்ட தங்கத்தேரில் எழுந்தருளினார். பக்தர்களின் கோவிந்தா, கோவிந்தா கோஷத்துடன் தங்கதேரானது மங்கள, மேள வாத்தியங்கள் முழங்க, கோவிலின் நான்கு ரத வீதிகளின் வழியாக வலம் வந்து இறுதியாக நிலையை வந்தடைந்தது.