திண்டுக்கல்; தாடிக்கொம்பு சவுந்தரராஜ பெருமாள் கோவிலில் ஆடி திருவிழா தேரோட்டம் நடைபெற்றது.

 தாடிக்கொம்பு சவுந்தரராஜ பெருமாள் கோயிலில் ஆண்டுதோறும் ஆடி மாதத்தில் ஆடிப்பெரும் திருவிழா கொண்டாடப்படுவது வழக்கம். அதன்படி கடந்த 12ம் தேதி இரவு 7 மணிக்கு மேல் வாஸ்து சாந்தி,அங்குரார்ப்பணம் போன்றவை நடைபெற்றன. 13 ம் தேதி கொடியேற்றம் நடந்தது. தொடர்ந்து, ஒவ்வொரு நாளும் காலை மற்றும் மாலை நேரங்களில் சிறப்பு மண்டகப் பணிகளை தொடர்ந்து அன்னம், சிம்மம், கேடயம், கருட, சேஷ, ஆஞ்சநேயர், யானை, குதிரை உள்ளிட்ட பல்வேறு வாகனங்களில் எழுந்துருளி தேரோடும் வீதிகள் வழியாக உலா வந்து பக்தர்களுக்கு அருள் பாலித்தார். கடந்த 19 ம் தேதி  திருக்கல்யாணம் நடைபெற்றது. திருக்கல்யாணத்தை தொடர்ந்து பூ பல்லக்கில் திருத்தம்பதியர் கோலத்தில் உலா வந்து அருள் பாலித்தார்.

இந்நிலையில், விழாவின் முக்கிய நிகழ்வான திருத்தேர் புறப்பாடு மாலை 4.30 மணிக்கு இன்று நடந்தது. முன்னதாக வள்ளி கும்மி ஆட்டம் நடைபெற்றது. தேரோட்டத்தை மாவட்ட அறங்காவலர் நியமன குழு தலைவர் சுப்பிரமணியம், தாடிக்கொம்பு பெருமாள் கோவில் அறங்காவலர் குழு தலைவர் விக்னேஷ் பாலாஜி உள்பட ஊர் முக்கியஸ்தர்கள் கொடி அசைத்து தொடங்கி வைத்தனர். முக்கிய பிரமுகர்கள் மற்றும் ஏராளமான பக்தர்கள் கலந்து கொண்டனர். திருவிழா ஏற்பாடுகளை அறங்காவலர் குழு தலைவர் விக்னேஷ் பாலாஜி மற்றும் உறுப்பினர்கள் வாசுதேவன், சுசீலா, கேப்டன் பிரபாகரன், ராமானுஜம், கோயில் செயல் அலுவலர் திருஞானசம்பந்தர் மற்றும் பட்டாச்சாரியார்கள் ராஜப்பா, ராமமூர்த்தி உள்ளிட்டோர் செய்திருந்தனர்.