பாலக்காடு; ஓணம் பண்டிகை முன்னிட்டு பலச்சேனையில் போர் அழைப்பை நினைவூட்டும் வகையில், அவிட்டத்தல்லு நிகழ்ச்சி கோலாகலமாக நடந்தது.

கேரள மாநிலம், ஓணம் பண்டிகையை கடந்த மூன்று நாட்களாக மக்கள் கோலாகலமாக கொண்டாடி மகிழ்ந்தனர். பாலக்காடு மாவட்டம் பலச்சேனையில் அவிட்டம் நாளான இன்று மாலை 4:30 மணி அளவில் நாயர் சமுதாயத்தினர் நடத்திய, அவிட்டத்தல்லு என அழைக்கப்படும், முதுகில் அறையும் நிகழ்ச்சி விமரிசையாக நடந்தது. ஊர் மன்னர் குரூர் நம்பிடியை ஏமாற்றி கொலை செய்ததால் ஆத்திரமடைந்த மக்கள், போர் அழைப்பு விடுத்ததை நினைவூட்டும் வகையில், வேட்டைக்கொருமன் கோவில் வளாகத்தில் இந்த நிகழ்ச்சி நடந்தது. இரு பிரிவு அணியினர், ஒருவருக்கொருவர் முதுகில் பலமாக அறைவது தான் இந்த அவிட்டத்தல்லு நிகழ்ச்சியின் சிறப்பு. ஒருவருக்கொருவர் அறைந்து செல்வது, உடற்பயிற்சி, குளத்தில் குளித்தல், சயனபிரதக்ஷிணம் ஆகியவற்றை காண, மாநிலத்தின் பல பகுதியில் இருந்து மக்கள் திரண்டு வந்தனர். இதேபோல் திருவோண நாளான நேற்று மாலை பல்லச்சேனை தல்லுமன்னம் பகுதியில் இதர சமுதாயத்தினர் திருவோணத்தல்லு நிகழ்ச்சி நடத்தி ஓணம் பண்டிகை கொண்டாடி இருந்தது குறிப்பிடத்தக்கது.