திருவண்ணாமலை; திருவண்ணாமலையில், கார்த்திகை தீபத் திருவிழாவையொட்டி,  2,668 அடி உயரம் உள்ள அண்ணாமலையார் மலை உச்சியில் மகாதீபம் ஏற்றும் ராட்சத கொப்பரைக்கு அருணாசலேஸ்வரர் கோவில் கிரிகோபுரம் அருகே சிறப்பு பூஜை நடந்தது. இதில் ஏராளமான பக்தர்கள் வழிபட்டனர்.

திருவண்ணாமலை அருணாசலேஸ்வரர் கோவிலில் கடந்த, 4ம் தேதி தீப திருவிழா கொடியேற்றத்துடன் துவங்கியது. தீபதிருவிழாவின் முக்கிய நிகழ்ச்சியாக நாளை, 13ம் தேதி, பஞ்ச பூதங்கள், ‘ஏகன், அனேகன்’ என்பதை விளக்கும் வகையில், அதிகாலை, 4:00 மணிக்கு, சுவாமி கருவறை எதிரில் பரணி தீபமும், ‘அனேகன், ஏகன்’ என்பதை விளக்கும் வகையில் மாலை, 6:00 மணிக்கு, 2,668, அடி உயர அண்ணாமலையார் மலை உச்சியில் மஹா தீபமும் ஏற்றப்பட உள்ளது. மஹா தீபம் ஏற்ற பயன்படுத்தப்படும் கொப்பரைக்கு அருணாசலேஸ்வரர் கோவில் கிரிகோபுரம் அருகே சிறப்பு பூஜை நடந்தது. இதில் ஏராளமான பக்தர்கள் வழிபட்டனர். தொடர்ந்த மகாதீபம் ஏற்றும் ராட்சத கொப்பரையை, இன்று அதிகாலை தோளில் சுமந்து கோவில் ஊழியர்கள் மலை ஏறினர். மேலும், மஹா தீபம் ஏற்ற, 4,500 கிலோ நெய் மற்றும், 1,000 மீட்டர் காடா துணியால் ஆன திரி, தயார் செய்யப்பட்டு தயார் நிலையில் உள்ளன. விழாவை முன்னிட்டு, சுவாமி சன்னதி முழுவதும், பல்வேறு வண்ணங்களில், பூக்களால் தோரணங்கள் கட்டி அலங்காரம் செய்யப்பட்டு வருகிறது. கோவில் வளாக கலையரங்கில் சமய சொற்பொழிவு, கலைநிகழ்ச்சிகளும், ஆன்மிக பாடல்களும் ஒலித்தவாறு, தீபதிருவிழா களை கட்டியுள்ளது.