பிரயாக்ராஜ்; இன்று மவுனி அமாவாசை என்பதால், பிரயாக்ராஜில் உள்ள திரிவேணி சங்கமத்தில் அமிர்த ஸ்நானம் செய்ய 8 கோடி பக்தர்கள் குவிந்துள்ளனர்.

உத்தர பிரதேச மாநிலம், பிரயாக்ராஜில் உள்ள திரிவேணி சங்கமத்தில், கங்கை, யமுனை, சரஸ்வதி நதிகள் சங்கமிக்கின்றன. இந்த இடத்தில், ஆண்டுதோறும் ‘மகாமேளா’ புனித நீராடுதல் நடக்கிறது. இந்த ஆண்டு நிகழ்வானது, 12 பூரண கும்ப மேளாவுக்கு பிறகு, அதாவது, 144 ஆண்டுகளுக்கு பிறகு நடக்கும் மஹா கும்பமேளா ஆகும். திரிவேணி சங்கமத்தில், இம்மாதம், 13ல் துவங்கிய மஹா கும்பமேளா, பிப்., 26ல் நிறைவடைகிறது. 45 நாட்களில், 45 கோடிக்கும் அதிகமான மக்கள் மஹா கும்ப மேளாவில் புனித நீராடுவர் என எதிர்பார்க்கப்பட்டது. நாடு முழுதும் மட்டுமின்றி, வெளி நாடுகளில் இருந்தும் பக்தர்கள், திரிவேணி சங்கமத்தில் புனித நீராடி வருகின்றனர். 

கும்பமேளா துவங்கியதில் இருந்து பக்தர்கள் குவிந்து வருகின்றனர். இந்நிலையில் இன்று மவுனி அமாவாசையை முன்னிட்டு, மகா கும்பமேளாவின் இரண்டாவது அமிர்த ஸ்நானம் நடைபெற்றது. இந்த நீராடல், மகா கும்பமேளா திருவிழாவின் முக்கிய நிகழ்வாகும். விழாவை முன்னிட்டு இன்று இது வரை  8 கோடி பக்தர்கள் குவிந்துள்ளனர். இன்று ஒரே நாளில், 10 கோடிக்கும் அதிகமான பக்தர்கள் வருவர் என எதிர்பார்க்கப்படுகிறது. புனித நீராடும் மக்களின் உயிர், உடைமைகள் போன்றவற்றுக்கு, உத்தர பிரதேச அரசும், மத்திய அரசும் பல்வேறு பாதுகாப்பு ஏற்பாடுகளை செய்துள்ளன. மொத்தம், 60,000 பேர் பாதுகாப்பு பணியில் ஈடுபடுத்தப்பட்டு உள்ளனர்.