மயிலாடுதுறை; வழுவூரில் இன்று கோலாகலமாக நடந்த வீரட்டேஸ்வரர் கோவில் கும்பாபிஷேகத்தில் தருமபுரம் ஆதீனம் உள்ளிட்ட திரளான பக்தர்கள் கலந்து கொண்டு தரிசனம் செய்தனர்.

மயிலாடுதுறை மாவட்டம் குத்தாலம் தாலுகா வழுவூரில் 1500 ஆண்டுகள் பழமை வாய்ந்த இளங்கிளை நாயகி சமேத கிர்த்திவாசர் கோவில் உள்ளது. தாருகாவனத்து முனிவர்கள் ஏவிய யானை வடிவிலான கஜாசுரனை இத்தளத்தில் சிவபெருமான் வீரட்டேஸ்வரராக எழுந்தருளி சம்ஹாரம் செய்து தோலை கிழித்து இடுப்பில் ஆடையாக அணிந்ததால் அட்ட வீரட்ட தலங்களில் 6வது ஸ்தலமாக விளங்கி வருகிறது. தேவாரப் பாடல்கள் மற்றும்  அருணகிரிநாதரால் திருப்புகழ் பாடப்பட்ட பழமை வாய்ந்த இந்த கோவிலின் கும்பாபிஷேகம் 24 ஆண்டுகளுக்கு பிறகு இன்று நடந்தது. 

கும்பாபிஷேகத்தை முன்னிட்டு கடந்த 30ம் தேதி பூர்வாங்க பூஜைகளுடன் ஏப் 1ம் தேதி யாகசாலை பூஜைகள் தொடங்கியது.  இன்று 6ம் கால யாகசாலை பூஜைகள் நிறைவடைந்து பூர்ணாகுதி மகா தீபாராதனை நடந்தது. காலை 9 மணிக்கு யாகசாலையில் இருந்து கடம் புறப்பாடு செய்யப்பட்டு சிவ மற்றும் மங்கள வாத்தியங்கள் முழங்க கோவிலை வலம் வந்து ராஜகோபுரம், சுவாமி, அம்பாள்,   வீரட்டேஸ்வரர் சன்னதி விமானங்களை அடைந்தது. தொடர்ந்து தருமபுரம் ஆதீனம் 27 வது குருமஹா சன்னிதானம் ஸ்ரீலஸ்ரீ கயிலை மாசிலாமணி தேசிக ஞானசம்பந்த பரமாசாரிய சுவாமிகள் முன்னிலையில் சிவாச்சாரியார்கள் வேத மந்திரங்கள் ஓத  சப்தமி திதி, மிருகசீரிஷம் நட்சத்திரம்,  சித்தயோகம் கூடிய 9:30 மணிக்கு  அனைத்து விமான கலசங்களுக்கும் ஏக காலத்தில் புனித நீர் ஊற்றப்பட்டு கும்பாபிஷேகம் நடந்தது. அப்போது ஹெலிகாப்டர் மூலம் விமான கலசங்களின் மீது பல்வேறு வகையான மலர்கள் தூவப்பட்டன. பின்னர் மூலவர்களுக்கு அபிஷேக ஆராதனைகள் நடைபெற்றன கும்பாபிஷேகத்தில் தருமபுரம் ஆதீன தம்பிரான்கள், முன்னாள் அதிமுக மாவட்ட செயலாளர் செந்தில்நாதன், இந்து புரட்சி முன்னணி மாவட்ட செயலாளர் ஜோதி குமரன், அரசு வக்கீல் ராம சேயோன் உள்ளிட்ட பல்லாயிரக்கணக்கான பக்தர்கள் கலந்து கொண்டு தரிசனம் செய்தனர்.  கும்பாபிஷேகத்தை கோவில் அர்ச்சகர் குருமூர்த்தி சிவாச்சாரியார் தலைமையில் ஆனோர் செய்து வைத்தனர். கும்பாபிஷேக ஏற்பாடுகளை கோயில் செயல் அலுவலர் முத்துக்குமார் மற்றும் இந்து சமய அறநிலையத்துறை  அதிகாரிகள் மற்றும் கிராமவாசிகள் செய்து இருந்தனர்  டிஎஸ்பி சுந்தரேசன் தலைமையில் போலீசார் பாதுகாப்பு பணியில் ஈடுபட்டிருந்தனர்.