புனர்பூசம்: முயற்சி வெற்றியாகும்..: ஞானக்காரகனான குருபகவானின் நட்சத்திரத்தில் நீங்கள் பிறந்திருந்தாலும் 1,2,3 ம் பாதமான மிதுனத்தில் பிறந்தவர்களுக்கு புதன் ராசிநாதனாகவும், 4ம் பாதமான கடகத்தில் பிறந்தவர்களுக்கு சந்திரன் ராசிநாதனாகவும் உள்ளனர்.

பிறக்கும் விசுவாவசு ஆண்டு 1,2,3ம் பாதங்களில் பிறந்தவர்களுக்கு முன்னேற்றமான ஆண்டாக இருக்கும். வியாபாரம், தொழில் வளர்ச்சிக்காக எடுக்கும் முயற்சிகள் வெற்றியாகும். குடும்பத்தில் நெருக்கடி நீங்கும். உத்தியோகத்தில் உயர்வு ஏற்படும். தடைபட்ட வேலைகள் நடந்தேறும். சுபநிகழ்ச்சிகள் நடந்தேறும். உடல்நிலையில் முன்னேற்றம் உண்டாகும். வழக்கு விவகாரம் சாதகமாகும். புதிய சொத்து சேரும். 4ம் பாதத்தில் பிறந்தவர்களுக்கு நெருக்கடி அதிகரிக்கும். பொருளாதாரத்தில் குறைவு தோன்றும். குடும்பத்தில் நிம்மதியற்ற நிலை, வருமானத்தில் தடை, உடல்நிலையில் பாதிப்பு ஏற்படும். மறைமுகத் தொல்லை அதிகரிக்கும். விரயச் செலவு கட்டுக்கடங்காமல் போகும்.

சனி சஞ்சாரம்: புனர்பூசம் 1, 2, 3 ம் பாதங்களில் பிறந்தவர்களுக்கு மார்ச் 6, 2026 வரை பாக்கிய சனியாகவும், 4ம் பாதத்தில் பிறந்தவர்களுக்கு அஷ்டம சனியாகவும் சஞ்சரிப்பதால் 1,2,3 ம் பாதத்தினருக்கு அதுவரை எடுக்கும் முயற்சிகள் வெற்றியாகும். உடல்நிலை சீராகும். பணி இடத்தில் ஏற்பட்ட பிரச்னைகள் முடிவிற்கு வரும். தொழிலில் பணியாளர்கள் ஒத்துழைப்பு கிடைக்கும். இடம், வீடு, வாகனம் சேரும்.  4ம் பாதத்தில் பிறந்தவர்களுக்கு பண நெருக்கடி, குடும்பத்தில் பிரச்னை, பிள்ளைகளால் சங்கடம், பூர்வீக சொத்து பிரச்னை, உடல் பாதிப்பு, மருத்துவச்செலவு, அவமானம்,  தொழிலில் தடை ஏற்படும்.

ராகு, கேது சஞ்சாரம்: புனர்பூசம் 1,2,3 ம் பாதங்களில் பிறந்தவர்களுக்கு 2025 ஏப். 26 முதல் ராகு பாக்கிய ஸ்தானத்திலும், கேது சகாய ஸ்தானத்திலும் சஞ்சரிப்பதால் சமுதாயத்தில் முன்னேற்றம் உண்டாகும். எடுக்கும் முயற்சிகள் வெற்றியாகும். நினைத்த வேலைகள் நடந்தேறும். வாழ்க்கையிலும், தொழிலிலும் உண்டான நெருக்கடிகள் நீங்கும். தடைபட்ட வருமானம் வரும். பெரியோர் ஆதரவு கிடைக்கும். 4ம் பாதத்தில் பிறந்தவர்களுக்கு ராகு அஷ்டம ஸ்தானத்திலும், கேது தன, குடும்ப, வாக்கு ஸ்தானத்திலும் சஞ்சரிப்பதால் வருமானத்தில் தடை, குடும்பத்தில் பிரச்னை ஏற்படும். உடல்நிலையில் சங்கடம், உங்களுக்கும் கீழ்ப்பட்டவர்களால் அவமானம் சந்திக்க நேரிடும். 

குரு சஞ்சாரம்: 

மே 11 வரை ரிஷபத்தில் சஞ்சரிக்கும் குரு, மே 11 முதல் மிதுனத்தில் சஞ்சரித்து அக்.8 முதல் அதிசாரமாக கடகத்திற்கு பெயர்ச்சியாகிறார். நவ.18 அன்று கடகத்தில் வக்ரமாகி, டிச.21ல் மீண்டும் மிதுனத்திற்குள் வக்கிரமாக பிரவேசிப்பவர் 2026 மார்ச் 17ல் வக்ர நிவர்த்தி அடைகிறார். இதனால் 1, 2, 3 ம் பாதங்களில் பிறந்தவர்களுக்கு மே 11 வரை செலவு அதிகரித்தாலும் விரும்பியதை அடைய முடியும். உடல் பாதிப்பு விலகும். வழக்கு வெற்றியாகும். அதன்பின் ஜென்ம குருவால் உழைப்பும் அலைச்சலும் அதிகரித்தாலும் முன்னேற்றம் ஏற்படும். பூர்வீக சொத்து கைக்கு வரும். புதிய வீடு, வாகனம் அமையும். 4ம் பாதத்தில் பிறந்தவர்களுக்கு மே 11 வரை நினைத்தது நடந்தேறும். வருமானம் அதிகரிக்கும். திருமணம், குழந்தை என்ற கனவு நனவாகும். சிலருக்கு மறுமணம் நடந்தேறும். சிலருக்கு மருத்துவச்செலவு ஏற்படும். பொன் பொருட்களை விற்று நிலைமைகளை சமாளிக்க வேண்டி வரும். மகிழ்ச்சி அதிகரிக்கும். புதிய நம்பிக்கை உண்டாகும்.

சூரிய சஞ்சாரம்: 

ஆத்ம காரகனான சூரியபகவான், 1, 2, 3 ம் பாதங்களில் பிறந்தவர்களுக்கு ஏப்.14 – மே 15,  ஆக.17 – செப்.16, டிச.16 – 2026 ஜன.14, மார்ச் 15 – ஏப்.13 காலங்களிலும், 4ம் பாதத்தில் பிறந்தவர்களுக்கு ஏப்.14 – ஜூன்14, செப்.17 – அக்.17, டிச.16 – 2026 ஜன.14 காலங்களிலும் தன் 3, 6, 10,11ம் சஞ்சார நிலைகளால் முன்னேற்றத்தை வழங்குவார். நெருக்கடியில் இருந்து பாதுகாப்பார். முயற்சிகளை வெற்றியாக்குவார். உடல் பாதிப்புகளை விலக்குவார். எதிரிதொல்லைகளை நீக்குவார். வழக்குகளை சாதகமாக்குவார். அரசுவழியில் எதிர்பார்த்த அனுமதி கிடைக்க வைப்பார். வருவாயை அதிகரிப்பார்.

செவ்வாய் சஞ்சாரம்: கிரகங்களில் சனி, ராகு – கேது, குருவிற்குப் பின் ஒரு ராசியில் அதிகநாள் நின்று பலன் தருபவர் செவ்வாய்தான். விசுவாவசு ஆண்டில் புனர்பூசம் 1,2,3 ம் பாதங்களில் பிறந்தவர்களுக்கு ஜூன்8 – ஜூலை 30, அக்.27 –  டிச.12 காலங்களிலும், 4ம் பாதத்தில் பிறந்தவர்களுக்கு ஜூலை30 – செப்.14, டிச.6 – ஜன.14 காலங்களிலும் செவ்வாயின் சஞ்சாரம் சாதகமாக இருப்பதால் உங்களுக்கிருந்த நெருக்கடி விலகும். தைரியமாகவும் துணிச்சலாகவும் செயல்படும் நிலை உண்டாகும். வியாபாரம், தொழில், குடும்பத்தில் இருந்த போராட்டநிலை மாறும். கையில் எடுத்த வேலைகளை முடித்து லாபம் காண்பீர்கள். உடல்  பாதிப்பு விலகும். செல்வாக்கு, அந்தஸ்து உயரும். பிரச்னை, வழக்குகள் இருந்த இடம் தெரியாமல் போகும். அரசியல்வாதிகளுக்கு எதிர்பார்த்த பொறுப்பு, பதவி கிடைக்கும்.

பொதுப்பலன்: விசுவாவசு ஆண்டில் உங்கள் செயல்களில் நிதானமும் கவனமும் வேண்டும். பிறரை நம்பி எந்தவொரு வேலையிலும் இக்காலத்தில் ஈடுபட வேண்டாம். தொழிலில் முழுமையான ஈடுபாட்டுடன் செயல்படுவது நன்மையாகும். பணியில் ஏற்பட்ட பிரச்னை முடிவிற்கு வரும். புதிய சொத்து. தொழில் என்ற கனவுகள் நனவாகும். குடும்பத்தினரை அனுசரித்துச் செல்வதால் பிரச்னைகள் மறையும். முயற்சிக்கேற்ற ஆதாயம் உண்டாகும்.

தொழில்:  

தொழில் முன்னேற்றமடையும். அரசு வழியில் எதிர்பார்த்த அனுமதி கிடைக்கும். ஏற்றுமதி இறக்குமதி, இன்டஸ்ட்ரீஸ், ஹார்டுவேர், எலக்ட்ரிக்கல், கம்ப்யூட்டர், குடிநீர், ஜூவல்லரி, பங்கு வர்த்தகம், பதிப்பகம், கல்வி நிறுவனம், கமிஷன் ஏஜன்சி,  விவசாயத் துறையில் லாபம் அதிகரிக்கும். 

பணியாளர்கள்: 

உழைப்பு அதிகரிக்கும். சிலருக்கு வெளியூர் மாறுதல் ஏற்படும். தற்காலிகப் பணியாளர்கள் மேலதிகாரியின் ஆலோசனையை ஏற்பது நன்மை தரும். தனியார் நிறுவன ஊழியர்கள் தன்னுடன் பணிபுரிபவர்களை அனுசரிப்பது அவசியம். 

பெண்கள்: 

குடும்பத்தில் இருந்த நெருக்கடி நீங்கும். திருமணம், குழந்தை பாக்கியம், சொந்த வீடு, அரசு வேலை என்ற கனவுகள் நனவாகும். வேலையில் முன்னேற்றம் ஏற்படும். கணவன், மனைவிக்குள் இருந்த பிரச்னை விலகும். பொன், பொருள் சேரும். 

கல்வி 

மாணவர்களுக்கு படிப்பில் அக்கறை கூடும். உயர்கல்வி என்ற லட்சியம் நிறைவேறும். விரும்பிய நிறுவனத்தில் இடம் கிடைக்கும்.

உடல்நிலை: 

நீண்ட நாளாக உங்களை சங்கடப்படுத்திய நோய்கள், தொற்று நோய்கள் மருத்துவத்தால் குணமாகும். சுறுசுறுப்பாக செயல்படுவீர்கள். ஆரோக்கியம் சீராகும்.

குடும்பம்: 

சுபநிகழ்ச்சிகள் நடந்தேறும். தம்பதியர் ஒருவரை ஒருவர் அனுசரித்துச் செல்வீர்கள். புதிய வீடு, வாகனம் வாங்குவீர்கள்.  பொன், பொருள் சேரும். பிள்ளைகளின் நலனில் அக்கறை செலுத்துவீர்கள். சேமிப்பை உண்டாக்குவீர்கள்.

பரிகாரம்: ஆலங்குடி குருபகவானை வழிபட வாழ்வில் நன்மை உண்டாகும்.