அபிராமி பட்டர் அன்னைக்காக உயிரை பணயம் வைத்து, தை அமாவாசையை பவுர்ணமியாக மாற்றிய தலம். இங்கு தான் அபிராமி அந்தாதி பாடப்பட்டது. எமனின் பாசக்கயிற்றில் இருந்து மார்க்கண்டேயனை காப்பாற்ற சிவபெருமான் காலசம்ஹார மூர்த்தியாக தோன்றிய தலம். எனவே, இங்கு 60, 70, 80வது திருமணங்கள் (சஷ்டியப்த பூர்த்தி, பீமரத சாந்தி, சதாபிஷேகம்) செய்து கொள்வது நீண்ட ஆயுளை தரும் என்பது ஐதீகம்.

மூலவர் அமிர்தகடேஸ்வரர் சுயம்புவாக அருள்பாலிக்கிறார். அன்னை அபிராமி மூன்றடி உயர பீடத்தில், நான்கு திருக்கரங்களுடன் நின்ற திருக்கோலத்தில் அருள்பாலிக்கிறாள். பாற்கடலில் கிடைத்த அமுதத்தை, திருமால் தேவர்களுக்கு பகிர்த்தளிக்கும்முன், சிவபூஜை செய்தார். அம்பிகையையும் பூஜிக்க வேண்டும். என்பது நியதி. எனவே, ஆபரணங்களை கழற்றி வைத்தார். அதிலிருந்து அபிராமி அம்பிகை தோன்றினாள்.

திருமால் மார்பில் அணிந்திருக்கும் ஆபரணங்களில், லட்சுமி வாசம் செய்வதாக நம்பிக்கை. கருவறையின் பின்புறம் சரஸ்வதி தேவிக்கும், அபிராமி பட்டருக்கும் தனி சன்னிதிகள் உள்ளன. தை அமாவாசை அன்று இரவு அபிராமி பட்டர் உற்சவம் நடைபெறும். அபிராமி அந்தாதி பாடப்படும். 79வது பாடலின்போது கொடிமரத்தின் அருகில் பவுர்ணமி தோன்றும் ஐதீகம் நடத்திக்காட்டப்படும்.

கோவில் முகவரி: அமிர்தகடேஸ்வரர் திருக்கோவில், திருக்கடையூர்- – 609311. மயிலாடுதுறை மாவட்டம். போன்: 04364 287429.

நேரம்: காலை: 6:00 – 1:00 மணி, மாலை: 4:00 – 9:00 மணி வரை