துமகூரு நகரில் இருந்து, 3 கி.மீ., தொலைவில், பழமையான ஷெட்டிஹள்ளி ஸ்ரீ ஆஞ்சநேயர் சுவாமி கோவில் உள்ளது. இக்கோவிலுக்கு அனைத்து மதத்தினரும், ஜாதியினரும் தரிசிக்க வருகை தருகின்றனர்.

புராணங்கள்படி, இக்கோவில் மஹாபாரதத்துடன் தொடர்பு கொண்டிருப்பதாக நம்பப்படுகிறது. மன்னர் ஜனமேஜயன், புனித யாகம் நடத்துவதற்கு முன், தடைகளை நீக்க கோரி, இந்த ஆஞ்சநேயரை பிரதிஷ்டை செய்து வழிபட்டார்.

இதன் மூலம் தடைகள் நீங்குவதாக நம்பப்படுகிறது. இத்தகைய புண்ணியகோவில், 19ம் நுாற்றாண்டில் சீரமைக்கப்பட்டது. அன்று முதல் ஆயிரக்கணக்கான பக்தர்கள் இக்கோவிலுக்கு வந்து, பிரார்த்தனை செய்கின்றனர்.

கோவிலின் பிரதான தெய்வம் ஸ்ரீ ஆஞ்சநேய சுவாமி தான். வலிமை, பக்தி, தைரியம், பாதுகாப்பின் வடிவமாக, சுவாமி வணங்கப்படுகிறார். கருவறையில் 10 அடி உயரம், 6 அடி அகல கல்லில் காட்சி அளிக்கிறார்.

உள்ளூர் நம்பிக்கையின்படி, கர்நாடகாவில் உள்ள ஹனுமன் சிலைகளில், புகழ் பெற்ற மூல்பாகல் ஹனுமனுக்கு அடுத்தபடியாக, மிகவும் உயரமான சிலைகளில் ஒன்றாக கருதப்படுகிறது.

சித்திரை மாதத்தில் விழா நடக்கிறது. சனிக்கிழமைகளில் இக்கோவிலுக்கு அதிகளவில் பக்தர்கள் வருகை தருகின்றனர்.