காரைக்குடி: காரைக்குடி முத்துமாரியம்மன் கோயிலில், அனுமதியின்றி காப்பு கட்டியவர்கள் வெளியேற்றப்பட்டனர். காரைக்குடி முத்து மாரியம்மன் கோயில், மாசி - பங்குனி விழா, கடந்த 12ம் தேதி கொடியேற்றத்துடன் தொடங்கியது. அறநிலையத்துறையால், அனுமதிக்கப்பட்ட நபர்களை விட, வெளி நபர்களும், காப்பு கட்டி வசூலில் ஈடுபட்டனர். இது குறித்து, தினமலர் இதழில் செய்தி வெளியானது. இதையடுத்து, செயல் அலுவலர் அய்யர் சிவமணி, அனுமதியின்றி காப்பு கட்டுவதில் ஈடுபட்ட, 20க்கும் மேற்பட்டவர்களை கோயிலை விட்டு வெளியேற்றினார்.கோயில் நிர்வாகத்தால், அனுமதிக்கப்பட்ட கட்டணத்தை விட அதிக கட்டணம் வசூலிப்பவர்கள் மீது நடவடிக்கை எடுக்கப்படும், என எச்சரித்துள்ளார்.அவர் கூறியதாவது: சேவை குழுக்கள் மூலமாக மட்டுமே காப்பு கட்டப்பட்டு வருகிறது. அனுமதிக்கப்பட்ட சீட்டு கட்டணத்தை தவிர வேறு எந்த கட்டணமும் பக்தர்கள் தர வேண்டியதில்லை. அர்ச்சனை ரூ.2, மாவிளக்கு ரூ.5, பொங்கல் ரூ.5, முடி காணிக்கை ரூ.10, பாவாடை காணிக்கை ரூ.5, காப்பு கட்டுதல் ரூ.5, பால்குடம் ரூ.10, சிறப்பு தரிசனம் ரூ.20, அபிஷேக சீட்டு ரூ.101, சந்தனகாப்பு அலங்காரம் ரூ.151, பிள்ளை விடுதல் காணிக்கை ரூ.25, கரும்பு தொட்டில் காணிக்கை ரூ.10 என அறநிலையத்துறை ஆணையாளரால் நிர்ணயிக்கப்பட்டுள்ளது. இதை தவிர அதிக கட்டணம் வசூலிப்பவர் மீது, பக்தர்கள் புகார் தெரிவிக்கலாம். அவர்கள் மீது நடவடிக்கை எடுக்கப்படும், என்றார்.