ஊட்டி: ஊட்டி மாரியம்மன் கோவில் கும்பாபிஷேகம் வரும் 9ம் தேதி நடக்கிறது. நுாற்றாண்டு பழமை வாய்ந்த, ஊட்டி மாரியம்மன் கோவில் திருப்பணி கடந்த சில மாதங்களாக துரித கதியில் நடந்து வருகிறது. வரும், 9ம் தேதி மகா கும்பாபிஷேகம் நடத்தப்பட உள்ளது. முன்னதாக, 7ம் தேதி பகல், 12:00 மணிக்கு விக்னேஸ்வர பூஜை, கணபதி பூஜை, தீபாராதனை, மாலை, 4:35 மணிக்கு, முதல் கால யாகவேள்வி, திரவியாகுதி, பூர்ணாகுதி நடக்கிறது. 8ம் தேதி காலை, 9:15 மணிக்கு இரண்டாம் காலயாக வேள்வி, மாலை, 5:00 மணிக்கு மூன்றாம் கால யாகவேள்வி, மாலை, 6:30 மணிக்கு யந்திர ஸ்தாபனம், அஷ்டபந்தன மருந்து சார்த்துதல் ஆகியவை நடக்கின்றன. 9ம் தேதி அதிகாலை, 5:55 மணிக்கு நான்காம் கால வேள்வி, நாடி சந்தானம், விமான கோபுரங்கள் மகா கும்பாபிஷேகம், பரவார மூர்த்திகளுக்கு மகா கும்பாபிஷேகம், காலை, 10:15 மணிக்கு மாரியம்மன் கும்பாபிஷேகம், குடமுழுக்கு தீபாராதனை, சிறப்பு வழிபாடுகள், காலை, 11:30 மணிக்கு அன்னதானம், மாலை, 5:30 மணிக்கு அம்பாள் புறப்பாடு ஆகியவை நடக்கின்றன. 10ம் தேதியில் இருந்து, 48 நாட்களுக்கு மண்டல பூஜை நடக்கிறது. மார்ச், 17ம் தேதி 108 கலசாபிஷேக மண்டலாபிஷேக பூர்த்தி நடக்கிறது. விழாவுக்கான ஏற்பாடுகளை, இந்து அறநிலையத்துறை அதிகாரிகள் மற்றும் பக்தர்கள் மேற்கொண்டுள்ளனர்.