மதுரை: மதுரை மீனாட்சி அம்மன் கோயில், அழகர்கோவில் கள்ளழகர் சித்திரை திருவிழாக்களின் பெருமையை விளக்கும் வண்ணம் முதல் முறையாக சிறப்பு தபால் அட்டைகள் நேற்று வெளியிடப்பட்டன.மீனாட்சி அம்மன் கோயில் பழைய திருக்கல்யாண மண்டபத்தில் விழா நடந்தது. தபால்துறை உதவி கண்காணிப்பாளர் ஆனந்தி வரவேற்றார். கோயில் இணை கமிஷனர் நடராஜன் தலைமை வகித்தார். சிறப்பு தபால் அட்டைகளை தபால்துறை தென் மண்டல இயக்குனர் நிர்மலாதேவி வெளியிட, இணை கமிஷனர் நடராஜன் பெற்று கொண்டார்.

நிர்மலாதேவி பேசியதாவது: மதுரை சித்திரை திருவிழா கோலங்கள், காட்சிகள் தபால் அட்டைகளில் அச்சிடப்பட்டு, அக்காட்சிக்கு ஏற்றவாறு பொருத்தமான தபால் தலைகள் ஒட்டப்பட்டு, இந்தியாவிலேயே முதல் முறையாக சித்திரை திருவிழா சிறப்பு தபால் அட்டைகள் வெளியிடப்பட்டன. உதாரணமாக, மீனாட்சி பட்டாபிஷேகம் தபால் அட்டையில் இடம் பெற்றிருக்கும். பெண் எழுச்சியை குறிக்கும் தபால் தலை, முகவரி எழுதும் பகுதியில் இடம் பெற்றிருக்கும். இதுபோல் 18 சிறப்பு தபால் அட்டைகள் கொண்ட உறை வெளியிடப்பட்டுள்ளது. உறை ஒன்றின் விலை 500 ரூபாய். இந்த வெளியீடு 500 எண்ணிக்கையில் வெளியாக உள்ளது. குறிப்பிட்ட காலம் மட்டுமே மதுரை தலைமை தபால் நிலையத்தில் கிடைக்கும். இது தமிழ் பண்பாடு, கலாசாரம், பாரம்பரியம் மதம், இனம், மொழிகளை கடந்து அனைவரும் அறிய வேண்டும் என்ற நோக்கத்தில் வெளியிடப்பட்டுள்ளது, என்றார். கோயில் செயற்பொறியாளர் சுப்பிரமணியன், தபால் துறை முதுநிலை கோட்ட கண்காணிப்பாளர் கணபதி சுவாமிநாதன், உதவி இயக்குனர் அழகர்சாமி, உதவி கண்காணிப்பாளர் (தொழில்நுட்பம்) சுரேஷ்குமார் உட்பட பலர் கலந்து கொண்டனர்.