காஞ்சிபுரம்: வரதராஜ பெருமாள் கோவில் பிரம்மோற்சவத்தில், கருட சேவை திருவிழா, நேற்று, விமரிசையாக நடைபெற்றது. வெளியூர்களில் இருந்தும் ஏராளமான பக்தர்கள் பங்கேற்று, பெருமாளை தரிசனம் செய்தனர்.

காஞ்சிபுரம் வரதராஜ பெருமாள் கோவில், வைகாசி பிரம்மோற்சவம், கடந்த ஞாயிற்றுக்கிழமை கொடியேற்றத்துடன் துவங்கியது. மூன்றாம் நாள் கருட சேவை உற்சவத்தை முன்னிட்டு, நேற்று அதிகாலை, 4:50 மணிக்கு, கோபுர தரிசனத்தில் ஆயிரக்கணக்கான பக்தர்கள் பங்கேற்று சுவாமியை வழிபட்டனர். பின், அங்கிருந்து சுவாமி புறப்பட்டு, திருக்கச்சி நம்பி தெரு வழியாக, விளக்கடி தெரு தேசிகர் கோவிலை அடைந்தார். அங்குப்பெருமாளுக்கு மரியாதை அளிக்கப்பட்டது. அங்கிருந்து தாயார் குளம் சாலை வழியாக பிள்ளையார்பாளையம் சென்றார். தொடர்ந்து, புத்தேரி தெரு வழியாக கச்சபேஸ்வரர் கோவிலை, காலை, 10:00 மணிக்கு அடைந்தார். அங்கு கூடியிருந்த ஆயிரக்கணக்கான பக்தர்களுக்கு காட்சியளித்தார். குடை மாற்றப்பட்டதும், கோவிந்தா... கோவிந்தா... என, பக்தர்கள் கோஷமிட்டனர்.