நாமக்கல்: ஆனி, சஷ்டி விழாவை முன்னிட்டு, முருகன் கோவில்களில் சிறப்பு வழிபாடு நடந்தது. நாமக்கல், மோகனூர் சாலை, பாலதண்டாயுதபாணி சுவாமி கோவிலில், நேற்று காலை, 10:00 மணிக்கு கணபதி பூஜையுடன் நிகழ்ச்சி துவங்கியது. தொடர்ந்து, மூலவருக்கு பால், தயிர், தேன், பஞ்சாமிர்தம், இளநீர், சந்தனம், மஞ்சள் உள்ளிட்ட பொருட்களால் அபிஷேகம் செய்யப்பட்டது. முத்தங்கி கவசம் சாற்றப்பட்டு செவ்வரளி, மனோரஞ்சிதம் மற்றும் மல்லிகை மாலைகள் அணிவிக்கப்பட்டு, ராஜ அலங்காரத்தில் பக்தர்களுக்கு, சுவாமி அருள்பாலித்தார். மகா தீபாராதனை காட்டப்பட்டு, பிரசாதம் வழங்கப்பட்டது. சுற்றுவட்டாரத்தை சேர்ந்த ஏராளமான பக்தர்கள் சுவாமியை வழிபட்டனர். அதேபோல், ப.வேலூர், குமாரபாளையம், பள்ளிபாளையம், ராசிபுரம், திருச்செங்கோடு என மாவட்டம் முழுவதும் உள்ள முருகன் கோவில்களில் சிறப்பு வழிபாடு நடந்தது.