கடைசி இரண்டு நாட்கள் தரிசனம், நெய் அபிஷேக நேரம் மாற்றப்பட்டுள்ளது. டிச., 26 அதிகாலை, 3:00 மணிக்கு நடை திறந்த பின், நெய் அபிஷேகம் துவங்கி காலை, 6:45 வரை நடக்கும். பின் உஷபூஜை முடிந்து, சூரிய கிரஹணத்துக்காக, 7:30 மணிக்கு நடை அடைக்கப்படும். 11:13 மணிக்கு கிரஹணம் முடிந்து, 11:30 மணிக்கு நடை திறக்கப்படும். பின், ஒரு மணி நேரம் நெய் அபிஷேகம் நடக்கும். உச்சபூஜைக்கு பின் பகல், 2:00 மணிக்கு நடை அடைக்கப்படும். மாலை, 5:00 மணிக்கு நடை திறக்கப்பட்டு தங்க அங்கியை வரவேற்க, சரங்குத்திக்கு தேவசம் போர்டு ஊழியர்கள் புறப்படுவர்.

மாலை, 6:30 மணிக்கு தங்க அங்கி அணிவித்து, தீபாராதனை நடந்த பிறகே தரிசனம் நடத்த முடியும். கிரஹணம் மற்றும் உச்சபூஜை முடிந்து, நடை அடைக்கப்பட்ட பிறகும், மாலை, 4:30 மணி வரை பக்தர்கள், 18 படியேற அனுமதிக்கப்படுவர். டிச., 27 அதிகாலை, 3:00 மணிக்கு நடை திறந்த பின் காலை, 9:30 மணி வரை நெய் அபிஷேகம் நடக்கும். பின், மண்டல பூஜை பணிகள் தொடங்கும். காலை, 10:00 முதல், 11:40 மணி வரை, கும்ப ராசியில் மண்டல பூஜை நடக்கும்.மதியம், 1:00 மணிக்கு நடை அடைக்கப்படும். மாலை, 4:00 மணிக்கு நடை திறக்கப்பட்டு, இரவு, 10:00 மணிக்கு நடை அடைக்கப்பட்டதும், 41 நாள் மண்டல காலம் நிறைவு பெறும்.