திருவண்ணாமலை: ஏழு தலை பாம்பு கொண்ட ஆதிசேஷன் சிலை செய்ய, 230 டன் எடையுள்ள பாறை, 138 டயர் கொண்ட -ராட்சத லாரி மூலம் கொண்டு செல்லும் பணி தொடங்கியது.

கர்நாடக மாநிலம், பெங்களூரு தெற்கு ஈஜிபுரா, கோதண்டராம சுவாமி கோவிலில், 64 அடி உயரம், 11 முகங்கள், 22 கைகள் கொண்ட, விஸ்வரூப கேதாண்டராம சுவாமி சிலை, ஆதிசேஷன் சிலை மற்றும் பீடத்துடன் சேர்த்து மொத்தம், 108 அடி உயரத்தில் அமைக்க முடிவு செய்தனர். இதற்கான பாறை, திருவண்ணாமலை மாவட்டம், வந்தவாசி அடுத்த கொரக்கோட்டை மலையில், மத்திய, மாநில அரசிடம், கோவில் அறக்கட்டளை சார்பில் அனுமதி பெறப்பட்டு, வெட்டி எடுக்கப்பட்டது. முதற்கட்டமாக, சுவாமி சிலை செய்ய, 64 அடி நீளம், 26 அடி அகலம், ஏழு அடி பருமனுடன், 380 டன் எடையுள்ள பாறை, கடந்த, 2018ல், 240 டயர்கள் கொண்ட ராட்சத லாரியில் பெங்களூரு கொண்டு செல்லப்பட்டது. தொடர்ந்து, ஆதிசேஷன் சிலை செய்ய, 24 அடி நீளம், 30 அடி அகலம், 12 அடி பருமனுடன், 230 டன் எடையுள்ள பாறையை எடுத்து செல்லும் பணி, நேற்று முன்தினம் மாலை, 5:00 மணிக்கு தொடங்கியது. இதற்காக, 138 டயர்கள் கொண்ட கன்டெய்னர் லாரியில் பாறை ஏற்றப்பட்டது. பக்தர்கள் கற்பூரம் ஏற்றி வழிபாடு செய்து, லாரியை வழியனுப்பி வைத்தனர். லாரி, தெள்ளார் வழியாக வந்தவாசி சென்றது. அங்கிருந்து, செய்யாறு, ஆற்காடு, வேலூர் கிருஷ்ணகிரி வழியாக பெங்களூரு கொண்டு செல்லப்படுகிறது. நாளொன்றுக்கு, 40 கி.மீ., தூரம் என கணக்கிட்டு, 10 நாட்களில் பெங்களூரு செல்ல திட்டமிடப்பட்டுள்ளது.