மயிலாடுதுறை : மயிலாடுதுறையில் குறுவட்ட அளவில் நடைபெற்ற பல்வேறு விளையாட்டுப் போட்டிகளில் வெற்றி பெற்ற மாணவர்கள் தருமபுரம் ஆதீனகர்த்தரை சந்தித்து ஆசி பெற்றனர்.

மயிலாடுதுறை குருஞானசம்பந்தர் மெட்ரிகுலேசன் பள்ளியில் 6-ஆம் வகுப்பு முதல் 12-ஆம் வகுப்பு வரை பயிலும் மாணவர்கள் அண்மையில் நடைபெற்ற குறுவட்ட அளவிலான தடகளப் போட்டிகள் மற்றும் பல்வேறு போட்டிகளில் முதல் மூன்று இடங்களைப் பிடித்து பதக்கங்களையும், சான்றிதழ்களையும் பெற்றனர். மேலும், மாவட்ட அளவில் நடத்தப்பட்ட கராத்தே, சிலம்பம் உள்ளிட்ட போட்டிகளில் பல மாணவர்கள் வெற்றி பெற்றனர். இதையடுத்து, வெற்றி பெற்ற மாணவர்கள் பள்ளிச் செயலர் பாஸ்கரன் மற்றும் பள்ளித் தலைமை ஆசிரியர் தலைமையில் தருமபுரம் ஆதீனம் 27-வது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகளை ஆதீனத்திருமடத்தில் சந்தித்து அருளாசி பெற்றனர். மாணவர்கள் பெற்ற பதக்கங்களை அவர்களுக்கு குருமகா சந்நிதானம் அணிவித்து ஆசி கூறினார்.