பேரூர்: பேரூராதீனத்தில், பேரூர் ஆதீனம் அருள்மிகு அம்பலவாணர் கோவில், ஆதிகுரு முதல்வர் அருள்திரு சாந்தலிங்க பெருமான் கோவில் திருக்குட நன்னீராட்டு பெருவிழாவிற்கான, முகூர்த்தக்கால் நடும் நிகழ்ச்சி நடந்தது.

பேரூர் தவத்திரு சாந்தலிங்க அடிகளார் திருமடத்தில், ஆதிகுரு முதல்வராக அருள் புரியும் அருள் திரு சாந்தலிங்க சுவாமிகள் திருக்கோவில் மற்றும் குரு முதல்வரின் வழிபடு தெய்வமாகிய அருள்மிகு அம்பலவாண பெருமானுக்கு புதிய விமானத்துடன் கூடிய கல் மண்டபம் அமைக்கும் பணிகள் நிறைவடைந்துள்ளது. பேரூர் ஆதீனம் அருள்மிகு அம்பலவாணர் கோவில், ஆதிகுரு முதல்வர் அருள்திரு சாந்தலிங்க பெருமான் கோவில் திருக்குட நன்னீராட்டு பெருவிழா, வரும், மார்ச் 3ம் தேதி நடக்கிறது. இதனையொட்டி, திருக்குட நன்னீராட்டு பெருவிழாவிற்கான முகூர்த்தக்கால் நடும் நிகழ்ச்சி நடந்தது. இதில், பேரூர் ஆதீனம் மருதாச்சல அடிகளார், குரு வழிபாடு செய்து, முகூர்த்தக்கால் நடவு செய்தார். இந்நிகழ்ச்சியில் ஏராளமான பக்தர்கள் கலந்து கொண்டனர்.