கொல்லங்கோடு : கொல்லங்கோடு பத்ரகாளி அம்மன் கோவிலில் இந்த ஆண்டு 1352குழந்தைகளுக்கு துாக்க நேர்ச்சை நிறைவேற்ற பெயர் பதிவு செய்யப்பட்டு உள்ளது. கொல்லங்கோடு பத்ரகாளி அம்மன் கோவிலில் பங்குனி பரணி துாக்க திருவிழா கடந்த 16ம் தேதி கொடியேற்றத்துடன் துவங்கி நடந்து வருகிறது. 25ம் தேதி குழந்தைகளுக்கான துாக்க நேர்ச்சை நடக்கிறது. துாக்க ரத வில்லில் நேர்ச்சை குழந்தைகளுடன் கோவிலை வலம் வரும் துாக்ககாரர்களுக்கு மருத்துவ பரிசோதனை நடந்தது. அவர்களின் உடல் திறனை சிறப்பு மருத்துவ குழுவினர் பரிசோதனை செய்து தகுதி சான்றிதழை வழங்கினர். தேர்வான துாக்ககாரர்கள் நேற்று முதல் துாக்க நேர்ச்சை முடியும் வரை கோவில் வளாகத்திலேயே தங்கி விரதம் இருப்பர்.

பெயர் பதிவு: இந்த நிலையில் நேர்ச்சை குழந்தைகளும் துாக்ககாரர்களும் நேற்று குலுக்கல் முறையில் வரிசை படுத்தபட்டனர். இதில் 1352 குழந்தைகளுக்கு நேர்ச்சை நிறைவேற்ற பெயர் பதிவு செய்யபட்டு உள்ளது. அத்துடன்  அம்மன் துாக்கம் 1, பண்டாரதுாக்கம் 1, பிடாகை துாக்கம் 1, அரசு துாக்கம் 1, ரிசர்வ் துாக்கம் 30 என 1386 துாக்கம் நடக்கிறது. முதல் ரதத்தில் அம்மன் துாக்கம், ப ண்டாரதுாக்கம், பிடாரை துாக்கம், அரசு துாக்கம் என 4 துாக்கம் நடக்கும். குழந்தைகள் இல்லாமல் இந்த 4 துாக்கமும் நடக்கும்.