மேல்மருவத்துார்: மேல்மருவத்துார் ஆதிபராசக்தி சித்தர் பீடத்தில், உகாதி விழாவை முன்னிட்டு, ஆதிபராசக்தி அம்மனுக்கு, நேற்று அதிகாலை 2:30 மணிக்கு, சங்கல்பம் செய்து சிறப்பு அபிஷேகம் நடந்தது. சித்தர் பீடம் வந்த பங்காரு அடிகளாரை, ஆந்திரா, தெலுங்கானா மாநில பொறுப்பாளர்கள் பாத பூஜை செய்து வரவேற்றனர். அதன்பின் அடிகளார், சித்தர் பீடம் வலம் வந்தபோது, செவ்வாடை பக்தர்கள், ஓம்சக்தி, பராசக்தி என கோஷம் எழுப்பினர். அதன்பின், பக்தர்களுக்கு யுகாதி பச்சடியுடன் அருட்பிரசாதம் மற்றும் அன்னதானம் வழங்கினர். இதில், தமிழ்நாடு, ஆந்திரா, தெலுங்கானா மாநில பக்தர்கள் பங்கேற்றனர். விழா ஏற்பாடுகளை, ஆதிபராசக்தி ஆன்மிக இயக்க தலைவர்லட்சுமி பங்காரு அடிகளார் மற்றும் ஆந்திரா, தெலுங்கானா மாநிலங்களைச் சேர்ந்த பொறுப்பாளர்கள் செய்திருந்தனர்.