செஞ்சி: மேல்மலையனுார் அங்காளம்மன் கோவிலில் சித்திரை மாத அமாவாசையை முன்னிட்டு சக்தி கரக ஊர்வலம் நடந்தது.

விழுப்புரம் மாவட்டம் மேல்மலையனுார் அங்காளம்மன் கோவிலில் ஒவ்வொரு மாதமும் அமாவாசையன்று ஊஞ்சல் உற்சவம் நடத்துகின்றனர். சித்திரை மாத அமாவாசையன்று சக்தி கரக ஊர்வலம் நடத்துகின்றனர். நேற்று முன்தினம் அமாவாசையை முன்னிட்டு காலை அம்மனுக்கு சிறப்பு அபிஷேகமும், தங்க கவச அலங்காரமும் செய்தனர். இரவு உற்சவர் அங்காளம்மன் "ஸ்ரீ குமார கணநாதாம்பிகா " கோலத்தில் பக்தர்களுக்கு அருள்பாலித்தார். உற்சவர் அங்காளம்மனுக்கு சிறப்பு வழிபாடு நடந்தது. இரவு 2 மணிக்கு அக்னி குளத்தில் இருந்து சக்தி கரகம் ஜோடித்து கிராம வீதிகள் வழியாக ஊர்வலமாக வந்தனர். அதிகாலை கோவிலுக்கு வந்த சக்தி கரகத்திற்கு சிறப்பு வழிபாடு நடத்தி வரவேற்றனர். விழா ஏற்பாடுகளை இந்து சமய அறநிலையத்துறை உதவி ஆணையர் ஜீவானந்தம, அறங்காவலர் குழு தலைவர் சந்தானம் மற்றும் அறங்காவலர்கள் செய்திருந்தனர். ஊஞ்சல் உற்சவம் இல்லை என்றாலும் வழக்கம் போல் பக்தர்கள் குவிந்திருந்தனர். இவர்கள் நீண்ட வரிசையில் நின்று சாமி தரிசனம் செய்தனர். விழாவை முன்னிட்டு பல்வேறு ஊர்களில் இருந்து சிறப்பு பஸ்களை இயக்கினர்.