தேவிபட்டினம்: தேவிபட்டினத்தில் பிரசித்தி பெற்ற நவபாஷாண நவக்கிரக கோயில் அமைந்துள்ளது. இங்கு முன்னோர்களுக்கு தர்ப்பணம் செய்யவும், பல்வேறு தோஷ நிவர்த்திகளுக்கு பரிகார பூஜைகள் செய்யவும், தினமும் ஏராளமான பக்தர்கள் வந்து செல்கின்றன. இங்கு செய்யப்படும் பரிகார பூஜைகளுக்கு தீர்வு கிடைப்பதாக பக்தர்கள் நம்புவதால், உள்ளூர் மட்டுமின்றி வெளி மாநிலங்களில் இருந்தும் ஏராளமான பக்தர்கள் நவபாஷாணத்திற்கு வந்து செல்கின்றன. இதனால் தினமும் பக்தர்கள் கூட்டம் நவபாஷாணத்தில் இருந்த வண்ணம் இருக்கும். இந்த நிலையில், கடந்த சில வாரங்களாக தொடர்ந்து சுட்டெரித்து வரும் கடும் வெயிலின் காரணமாக, காலை 10:00 மணி முதல் மாலை 4:00 மணி வரை பக்தர்கள் வருகை கடந்த சில வாரங்களாக குறைந்துள்ளது. பள்ளி விடுமுறை நாட்களில் மட்டுமே தற்போது நவபாஷாணத்திற்கு ஓரளவு பக்தர்கள் கூட்டம் வருவதாகவும், மற்ற நாட்களில் வெயில் தாக்கத்தின் காரணமாக பக்தர்கள் கூட்டம் குறைந்த அளவிலே வருவதாகவும் நவபாஷாண ஊழியர்கள் தெரிவித்தனர்.