மகம்: ஞான மோட்சக்காரகனான கேது, ஆத்ம காரகனான சூரியனின் அம்சத்தில் பிறந்திருக்கும் உங்களுக்கு இந்த மாதம் ராசிநாதன் 6 ம் இடத்தில் சஞ்சரிப்பதால் உங்கள் நிலையில் முன்னேற்றம் உண்டாகும். ஆரோக்கியம் சீராகும். போட்டியாளர்களால் உண்டான சங்கடங்கள் அகலும். எதிரிகள் விலகிச் செல்வர். வழக்குகளில் உங்களுக்கு சாதகமான நிலை ஏற்படும். பொது வாழ்க்கையில் ஈடுபட்டிருப்பவர்களின் செல்வாக்கு உயரும். அரசாங்கத்தில் எதிர்பார்த்த அனுமதிகள் கிடைக்கும். குடும்ப ஸ்தானத்தில் கேது பகவான் சஞ்சரிப்பதால் வார்த்தைகளில் கவனம் அவசியம். குடும்ப உறவுகளிடம் அனுசரித்துச் செல்வதால் நன்மை அதிகரிக்கும். மாதத்தின் பிற்பகுதியில் சொத்து சேர்க்கை உண்டாகும். அரசியல்வாதிகளின் செல்வாக்கு உயரும். கலைஞர்கள் இக்காலத்தில் நிதானமாக செயல்படுவது நன்மையாகும். அந்நியர்களால்  சில சங்கடங்கள் ஏற்படுவதற்கு வாய்ப்புண்டு. வெளிநாட்டு முயற்சிகள் இக்காலத்தில் இழுபறியாகும். வாழ்க்கைத்துணைக்கும் உங்களுக்கும் பிரச்னைகள் தோன்றி மறையும். பெண்களுக்கு இந்த மாதம் சுமாராக இருக்கும். முயற்சிகள் யாவும் கடுமையான போராட்டத்திற்குப் பின் நிறைவேறும். பணியில் வேலைப்பளு அதிகரிக்கும். இருந்தாலும் உங்கள் தனித்திறமை போற்றப்படும். மாணவர்களுக்கு படிப்பில் கவனம் அதிகரிக்கும்.
சந்திராஷ்டமம்: பிப்.12
அதிர்ஷ்ட நாள்: ஜன.16,19,25,28. பிப். 1,7,10.
பரிகாரம்: காளத்தீஸ்வரரை வழிபட கஷ்டம் தீரும்.

பூரம்: ஆத்மகாரகனான சூரியன், அதிர்ஷ்டக்காரகனான சுக்கிரனின் அம்சத்தில் பிறந்த உங்களுக்கு நீங்கள் மேற்கொள்ளும் முயற்சிகளில் முழுமையான கவனம் இருக்கும். எடுத்த காரியத்தை முடிக்க வேண்டும் என்ற எண்ணம் இருக்கும். இந்த மாதம் உங்கள் நட்சத்திரநாதன் எதிர்பார்ப்புகளை நிறைவேற்றுவார். பொன், பொருள் சேர்க்கையை உண்டாக்குவார். வருமானத்தை அதிகரிப்பார். சிலருக்கு புதிய வாகனம், சொத்து சேர்க்கை உண்டாகும். அரசு வகையில் மேற்கொள்ளும் முயற்சிகள் வெற்றியாகும். தொழில் தொடங்க, வெளிநாடு செல்ல எதிர்பார்த்த அனுமதி கிடைக்கும். வழக்கு விவகாரங்களில் சாதகமான நிலை ஏற்படும். பணியில் இருப்பவர்களின் பிரச்னைகள் விலக ஆரம்பிக்கும். பணியாளர்கள் சங்கடங்களில் இருந்து விடுபடுவர். வியாபாரத்தில் அக்கறை அதிகரிக்கும். லாபநிலை ஏற்படும். அரசியல்வாதிகளின் செல்வாக்கு உயரும். குடும்ப ஸ்தானத்தில் கேது சஞ்சரித்தாலும் குருவின் பார்வை உங்களுக்கு உண்டாவதால் சங்கடங்கள் இல்லாமல் போகும். எல்லாவற்றையும் சமாளிப்பீர்கள். சப்தம ஸ்தானத்தில் சஞ்சரிக்கும் சனியால் வாழ்க்கைத்துணையின் உடல்நிலையில் சங்கடங்கள் ஏற்பட வாய்ப்புண்டு என்பதால் கவனம் அவசியம். பெண்களுக்கு குடும்பத்தில் எதிர்பார்த்த நிம்மதி இருக்கும் என்றாலும் வாழ்க்கைத் துணையின் உடல்நிலையில் அக்கறை செலுத்த வேண்டியதாக இருக்கும். மாங்கல்ய ஸ்தானத்தில் சஞ்சரிக்கும் ராகுவால் எதிர்பாராத பிரச்னைகள் தோன்றும் என்பதால் நேரம் அறிந்து செயல்படுவது அவசியம். விவசாயிகளுக்கு எதிர்பார்த்த ஆதாயம் உண்டாகும். மாணவர்களுக்கு படிப்பின் மீது அக்கறை அதிகரிக்கும். ஆசிரியர்களின் ஆலோசனையை ஏற்று செயல்படுவீர்கள்.
சந்திராஷ்டமம்: ஜன.15.
அதிர்ஷ்ட நாள்: ஜன. 19,24,28. பிப். 1,6,10.
பரிகாரம்: மீனாட்சி அம்மனை வழிபட மேன்மை உண்டாகும்.

உத்திரம் 1 ம் பாதம்: பாவங்களை எல்லாம் அழித்திடக் கூடிய ஆன்ம காரகனான சூரியனின் நட்சத்திரத்திலும், ராசியிலும் பிறந்த உங்களுக்கு அனைத்திலும் தேர்ந்த ஞானம் என்பது எப்போதும் இருக்கும். அதனால் வாழ்க்கையின் ஒவ்வொரு அம்சங்களையும் புரிந்துகொண்டு அதற்கேற்ப செயல்படுவீர்கள். இந்த மாதத்தில் சூரியன் 6ம் இடத்தில் சஞ்சரிப்பதால் நீங்கள் எடுத்த காரியங்கள் எல்லாவற்றிலும் வெற்றி உண்டாகும். முயற்சிகள் யாவும் சாதகமாகும். புதிய தொழில் தொடங்க நினைத்தவர்களின் எண்ணம் நிறைவேறும்.  தொழிலில் ஆதாயம் அதிகரிக்கும். அரசு வழியில் எதிர்பார்த்த சலுகைகள் கிடைக்கும். கடந்த காலங்களில் இருந்த சங்கடங்கள் விலக ஆரம்பிக்கும். 2ம் இட கேது, 7ம் இட சனி, 8ம் இட ராகுவால் ஏற்படும் நெருக்கடிகளை 6ம் இட சூரியனும், பாக்ய குருவும் விலக்கி வைப்பார்கள். புதிய சொத்து சேர்க்கை உண்டாகும். திருமண வயதினருக்கு வரன் தேடி வரும். குழந்தை பாக்கியத்திற்காக காத்திருந்தவர்களின் எதிர்பார்ப்பு பூர்த்தியாகும். பணியாளர்கள் நிலையில் முன்னேற்றம் தோன்றும். குடும்பத்தில் இருந்த பிரச்னைகள் விலகும். அரசியல்வாதிகளின் செல்வாக்கு உயரும். சிலர் புதிய வீட்டில் குடியேறுவர். கணவன், மனைவிக்குள் இருந்த சங்கடங்கள் விலக ஆரம்பிக்கும். பெண்களின் விருப்பம் நிறைவேறும். குழந்தைகளால் பெருமை உண்டாகும். குலதெய்வ அருள் கிடைக்கும். வாழ்க்கைத் துணையின் நலனில் கூடுதல் கவனம் செலுத்தி வருவது நன்மையாக இருக்கும். விவசாயிகளின் விலைபொருட்கள் நல்ல விலை போகும். வியாபாரம் சிறப்பாக இருக்கும். மாணவர்கள் படிப்பில் முன்னேறுவர்.
சந்திராஷ்டமம்: ஜன. 16.
அதிர்ஷ்ட நாள்: ஜன. 19, 28. பிப். 1,10.
பரிகாரம்: திருக்கோவிலுார் வீரட்டேஸ்வரரை வழிபட வினைகள் தீரும்.