ஆர்.எஸ்.மங்கலம்; ஆர்.எஸ்.மங்கலம் அருகே உப்பூரில் விநாயகருக்கு இரு தேவியருடன் நடைபெற்ற திருமண விழாவில், ஏராளமான பக்தர்கள் கலந்து கொண்டு தரிசனம் செய்தனர்.

ராமநாதபுரம் மாவட்டம், ஆர்.எஸ்.மங்கலம் அருகே உப்பூரில் பிரசித்தி பெற்ற விநாயகர் கோயில் அமைந்துள்ளது. இந்த மூலவர் விநாயகர் மீது, பகல் முழுவதும் சூரிய ஒளி படும் வகையில் கருவறை அமையப் பெற்றுள்ளதால், வெயிலுகந்த விநாயகர் என்று அழைக்கப்படுகிறார். மேலும் சீதாபிராட்டியை மீட்பதற்காக ராமபிரான் இலங்கைக்கு செல்வதற்கு முன் இந்த விநாயகரை வணங்கிச் சென்றதாக கூறப்படுவதால் சிறப்புமிக்க கோயிலாக உள்ளது. இத்தகைய முக்கியத்துவம் வாய்ந்த கோயிலில் ஆண்டு தோறும் சதுர்த்தி விழா 10 நாட்கள் நடக்கிறது. இங்கு ஆக.29ல் கொடியேற்றத்துடன் சதுர்த்தி விழா துவங்கியது. அன்று முதல் தினமும் மாலையில் வெள்ளி மூசிகம், கேடகம், சிம்மம், மயில், யானை, ரிஷபம், காமதேனு உள்ளிட்ட வாகனங்களில் விநாயகர் ஊர்வலம் நடைபெற்றது. இந்த நிலையில் விழாவில் எட்டாம் நாளான நேற்று மூலவர், விநாயகருக்கு சிறப்பு அபிஷேக ஆராதனைகள் நடைபெற்று, மாலை 4:30 மணியளவில், சித்தி, புத்தி ஆகிய இரு தேவியருடன் விநாயகருக்கு திருக்கல்யாணம் நடைபெற்றது. தென் தமிழகத்திலே இரு தேவியருடன் இந்த விநாயகருக்கு மட்டுமே திருக்கல்யாணம் நடைபெறுவதால், விழாவில் வெளி மாவட்டங்களைச் சேர்ந்த ஏராளமான பக்தர்கள் கலந்து கொண்டனர். விழாவில் கலந்து கொண்ட பெண்களுக்கு மஞ்சள் கயிறு, குங்குமம், வளையல் வழங்கப்பட்டன. தொடர்ந்து நடைபெற்ற மொய் விருந்தில், பரிமாறப்பட்ட கொழுக்கட்டைகளை பக்தர்கள் பெற்றுச் சென்றனர். தொடர்ந்து இருதேவியருடன் விநாயகர் குதிரை வாகனத்தில் வீதி உலா வந்து பக்தர்களுக்கு அருள் பாலித்தார்.