பாலக்காடு; ஓணம் பண்டிகையை முன்னிட்டு, பிரசித்தி பெற்ற திருச்சூர் வடக்கு நாதர் கோவில் முன் போடப்பட்ட பிரம்மாண்ட அத்தப்பூக்கோலம் அனைவரையும் கவர்ந்தது.

கேரளாவில் ஓணம் பண்டிகை, வரும் 14, 15, 16 தேதிகளின் கொண்டாடப்படுகிறது. இதை முன்னிட்டு அத்தம் நாளான நேற்று முதல், பத்து நாட்கள் பூக்கோலம் போடுவது வழக்கம். இந்த நிலையில் திருச்சூரில் உள்ள பிரசித்தி பெற்ற வடக்கு நாதர் கோவிலில், தெற்கு கோபுர நடை முன், மாலை கூட்டமைப்பு சார்பில் பிரமாண்ட அத்தப்பூக்கோலம் போடப்பட்டுள்ளது. இதை ஏராளமான மக்கள் கண்டு மகிழ்ந்தனர். அமைப்பின் தலைமையிலான, 200க்கும் மேற்பட்டோர் சேர்ந்து, 30 அடி விட்டத்தில் 2000 கிலோ பூக்களால் இக்கோலத்தை தயாரித்துள்ளனர். செண்டு மல்லி, வாடா மல்லி, சாமந்தி ஆகிய பூக்கள் பூக்கோலத்திற்கு மேலும் வண்ண பொலிவூட்டின. சமீபத்தில் வயநாட்டில் நிகழ்ந்த நிலச்சரிவு விபத்து தொடர்புடைய புகைப்படங்களை உட்படுத்தியுள்ள பூக்கோலத்தை செல்பி எடுக்கவும், கண்டு மகிழவும், காலை முதல் மக்கள் இரண்டு வந்திருந்தனர். இந்த அமைப்பு கடந்த 17 ஆண்டுகளாக, தொடர்ந்து இந்த அத்தப்பூக்கோலத்தை தயாரித்து வருகிறது குறிப்பிடத்தக்கது. இதையொட்டி நடந்த நிகழ்ச்சியை, கொச்சின் தேவஸ்தானம் நிர்வாக குழு தலைவர் சுதர்சன் துவக்கி வைத்தார். நிகழ்ச்சியில் மாலை கூட்டமைப்பு சேகரித்த வயநாடு நிவாரண நிதியை கேரளா வங்கி துணைத் தலைவர் கண்ணன் பெற்றுக்கொண்டார். தொழிலதிபர் பட்டாபிராமன் (கல்யாண் குழுமம்), வழக்கறிஞர் ஷோபி ஆகியோர் நிகழ்ச்சியில் கலந்து கொண்டனர்.