திருவண்ணாமலை; 32 அடி உயர வெள்ளி ரிஷப வாகனத்தில் அருணாசலேஸ்வரர் மாட வீதி உலா வந்து அருள்பாலித்தார்.

திருவண்ணாமலை அருணாசலேஸ்வரர் கோவிலில், கார்த்திகை தீப திருவிழா கடந்த, 4ல், கொடியேற்றத்துடன் தொடங்கி நடைபெற்று வருகிறது. கார்த்திகை தீப திருவிழாவில், ஐந்தாவது நாளான நேற்று அதிகாலை நடை திறக்கப்பட்டு, அருணாசலேஸ்வரர், உண்ணாமுலையம்மனுக்கு சிறப்பு அபிஷேகம், சிறப்பு பூஜை நடந்தது. காலை, 10:00 மணிக்கு வெள்ளி மூஷிக வாகனத்தில் விநாயகர், கண்ணாடி ரிஷப வாகனத்தில் சந்திரசேகரர் சுவாமி வீதியுலா நடந்தது. இரவு, 10:00 மணிக்கு நடந்த பஞ்சமூர்த்திகள் வீதி உலாவில், வெள்ளி சின்ன ரிஷப வாகனத்தில் விநாயகர், வெள்ளி மயில் வாகனத்தில் வள்ளி, தெய்வானை சமேத சுப்ரமண்யர், வெள்ளி பெரிய ரிஷப வாகனத்தில் அருணாசலேஸ்வரர், வெள்ளி சின்ன ரிஷப வாகனத்தில் பராசக்தி அம்மன், வெள்ளி ரிஷபத்தில் சண்டிகேஸ்வரர் வீதி உலா சென்று பக்தர்களுக்கு அருள் பாலித்தனர். ஆயிரக்கணக்கான பக்தர்கள் தரிசனம் செய்தனர்.