திருக்கோவிலூர்; திருக்கோவிலூர் உலகளந்த பெருமாள் கோவில் பங்குனி பிரம்மோற்சவ விழாவின் 5ம் நாளான நேற்று இரவு பெருமாள் தங்க கருட வாகனத்தில் பக்தர்களுக்கு அருள்பாலித்தார்.

திருக்கோவிலூர் உலகளந்த பெருமாள் கோவிலில் கடந்த 4ம் தேதி பங்குனி பிரம்மோற்சவ விழா கொடியேற்றத்துடன் துவங்கியது. விழாவின் முக்கிய நிகழ்ச்சியாக நேற்று கருட சேவை வைபவம் நடந்தது. காலை 7:00 மணிக்கு ஸ்ரீதேவி பூதேவி சமேதராக தேகளீச பெருமாள் தங்க பல்லக்கில் வீதி உலா நடந்தது. 11:00 மணிக்கு சுவாமிக்கு சிறப்பு திருமஞ்சனம், அலங்காரம், தீபாராதனை, மாலை 6:00 மணிக்கு ஊஞ்சல் சேவையில் பக்தர்களுக்கு அருள்பாலித்தனர்.  இரவு 9:00 மணிக்கு தங்க கருட வாகனத்தில் பெருமாள் சிறப்பு அலங்காரத்துடன் எழுந்தருளி பக்தர்களுக்கு அருள் பாலித்தார். கோவிந்தா கோஷம் முழங்க வாணவேடிக்கையுடன் நடந்த வீதி உலாவில் ஆயிரக்கணக்கான பக்தர்கள் கலந்து கொண்டு சுவாமி வழிபாடு செய்தனர். விழாவின் முக்கிய நிகழ்ச்சியாக வரும் 12ம் தேதி காலை தேரோட்டம் நடக்கிறது. ஜீயர் ஸ்ரீ தேகளீச ராமானுஜாச்சாரிய சுவாமிகள் உத்தரவின் பேரில், கோவில் ஏஜென்ட் கிருஷ்ணன் விழாவிற்கான ஏற்பாடுகளை செய்து வருகிறார்.