உங்கள் நட்சத்திர நாதனான செவ்வாய்க்கு ராகு, கேது இருவரும் பகைவர்கள் என்றாலும், கோச்சார ரீதியாக அவர்கள் சஞ்சரிக்கும் போது, சஞ்சரிக்கும் இடத்திற்குரிய பலன்களை வழங்க வேண்டியவர்களாகிறார்கள். அவிட்டம் 1, 2ம் பாதங்களில் பிறந்தவர்களுக்கு ராகு, தன குடும்ப வாக்கு ஸ்தானத்திலும், 3,4ம் பாதத்தினருக்கு ஜென்ம ராசிக்குள்ளும் சஞ்சரிக்கிறார். கேது, அவிட்டம் 1,2ம் பாதத்தினருக்கு அஷ்டம ஸ்தானத்திலும், 3,4ம் பாதத்தினருக்கு சப்தம ஸ்தானத்திலும் சஞ்சரிக்கிறார்.

இதனால் ராகு 1,2ம் பாதத்தில் பிறந்தவர்களுக்கு குடும்பத்தில் நிம்மதியற்ற நிலையும், பண வரவில் தடையும், மனதில் பயமும், செய்யும் தொழிலில் ஆதாயமற்ற நிலையும்,  சட்டத்திற்கு புறம்பான செயலும், குடும்பத்தில் அடுத்தவரின் தலையீடும், இருக்கும் இடத்தில் நெருக்கடியும், வேலையில் எதிர்பாராத இட மாற்றமும் உண்டாகும். 3, 4 ம் பாதத்தினருக்கு உற்றார், உறவினருடன் கருத்து வேறுபாடு, பகைமை, இடமாற்றம், தொழில் மீது அக்கறை, மனதில் ஆசைகளை அதிகரிப்பார். புதுப்புது முயற்சிகளை மேற்கொள்ள வைப்பார். உங்களை அடையாளப் படுத்திக் கொண்டு எதிலும் முதன்மையாக இருக்க வேண்டும் என்ற எண்ணத்தை ஏற்படுத்துவார்.

கேது, அவிட்டம் 1, 2ம் பாதத்தினருக்கு இக்காலத்தில் அஷ்டம ஸ்தானத்தில் சஞ்சரிப்பதால், தொட்ட காரியங்கள் அனைத்திலும் தோல்வியை ஏற்படுத்துவார். மனம், உடலில் நலிவை  உண்டாக்குவார். சிலரை விபத்தில் சிக்க வைப்பார். மருத்துவச் செலவு அதிகரிக்கும். சொந்த பந்தங்களுடன் கருத்து வேறுபாடு, வேலை, தொழிலில் போராட்டம், சிலருக்கு அவமானத்தை ஏற்படுத்துவார். இருக்கும் இடத்தில் மாற்றம், வெளியூரில் வசிக்க வேண்டிய நிலையை உண்டாக்குவார். 3, 4ம் பாதத்தினருக்கு, புதிய உறவிற்கு வழிகாட்டுவார். கணவன் மனைவிக்குள் பிரச்னை, பிரிவு என்ற நிலையை உண்டாக்குவார். உறவினர்களை விட்டு விலக வேண்டிய நிலையை ஏற்படுத்துவார். மனம் போக்கில் வாழச் செய்வார். வசிக்கும் இடத்தை விட்டு வேறு இடத்திற்கு செல்லும் நிலையை உருவாக்குவார். 

சனி சஞ்சாரம்

கும்பத்தில் ராகுவும், சிம்மத்தில் கேதுவும் சஞ்சரிக்கும் நாளில் சனி பகவான் கும்பத்தில் ஆட்சியாக சஞ்சரிக்கிறார். 2026 மார்ச் 6ல் மீன ராசிக்கு பெயர்ச்சி ஆகிறார். இதனால் 1,2 ம் பாதத்தினருக்கு மார்ச் 6 வரை குடும்பத்தில் குழப்பம், நிம்மதியற்ற நிலை, வருமானத்தில் தடை, உடல்நிலையில் நலிவை உண்டாக்குவார். 2026 மார்ச் 6 முதல் இந்த நிலை மாறும். 3ம் இடத்து சனி முயற்சிகளை வெற்றியாக்குவார். முன்னேற்றத்தை உண்டாக்குவார். செல்வாக்கு, அந்தஸ்தை உயர்த்துவார். தடைபட்ட வேலைகளை நடத்தி வைப்பார். ஆரோக்கியத்தை சீராக்குவார். எதிர்பார்ப்பை பூர்த்தியாக்குவார். 3,4 ம் பாதத்தினருக்கு மார்ச் 6 வரை உடல் ஆரோக்கியத்தில் பாதிப்பை ஏற்படுத்துவார். பணத்தட்டுப்பாட்டை அதிகமாக்குவார்.  நண்பர்கள், உறவினரை பகையாளிகளாக மாற்றுவார். செய்யும் தொழிலில் பாதிப்பை ஏற்படுத்துவார். நன்றாகப் பழகி வந்தவர்களையும் உங்களை விட்டு விலக வைப்பார். மனதில் பயத்தை அதிகரிப்பார். மார்ச் 6 முதல் குடும்பத்தில் நிம்மதியற்ற நிலை இருக்கும். அஜாக்கிரதையால் பொன், பொருள் களவு போகும். வாழ்க்கைத்துணையின் உடல்நிலையில் பாதிப்பு உண்டாகும். பெண்களின் மாங்கல்யத்திற்கு சோதனை ஏற்படும். தொழில், வேலையில் நிம்மதியற்ற நிலை இருக்கும். மனதில் குழப்பம் இருந்து கொண்டே இருக்கும்.

குரு சஞ்சாரம்

மே 11 வரை ரிஷபத்திலும், அதன்பின் மிதுனத்திலும், அக்.8 முதல் கடகத்திற்கு அதிசாரமாகவும் செல்பவர், நவ. 18 முதல் அங்கு வக்கிரமடைகிறார். அதே வக்கிர நிலையில் டிச. 21ல் மிதுனத்திற்கு வருபவர் 2026 மார்ச் 17ல் வக்கிர நிவர்த்தி அடைகிறார். அங்கிருந்து மே 26ல் கடகத்திற்கு பெயர்ச்சியாகிறார். இந்த நிலைகளால், 1, 2 ம் பாதத்தினருக்கு

மே 11 வரை நினைப்பது நிறைவேறும். பூர்வீக சொத்தில் ஏற்பட்ட பிரச்னைகள் முடிவிற்கு வரும். பிள்ளைகளால் பெருமை உண்டாகும். திருமண வயதினருக்கு கழுத்தில் மாலை ஏறும். சிலருக்கு குழந்தை பாக்கியம் உண்டாகும். வியாபாரம், தொழில் முன்னேற்றம் பெறும். மே 11 முதல் இந்நிலையில் மாற்றம் உண்டாகும். எதை எடுத்தாலும் ஏதாவது ஒரு பிரச்னை உண்டாகும் என்றாலும், குரு பார்வையால் தொழில், வேலையில் இருந்த சங்கடங்கள் விலகும். சிலர் புதிய தொழில் தொடங்குவர். குடும்பத்தில் நிம்மதி இருக்கும். பணப்புழக்கம் அதிகரிக்கும். பட்டம், பதவி என பெருமை ஏற்படும். 3, 4ம் பாதத்தினருக்கு மே 11 வரை குரு பார்வைகளால் ஆரோக்கியம் மேம்படும். செல்வாக்கு வெளிப்படும். தொழில் முன்னேற்றம் பெறும். சுபச்செலவு அதிகரிக்கும். மே 11 முதல் மிதுன குருவின் பார்வை ராசிக்கு உண்டாவதால், ஜென்மச் சனி, ராகுவால் உண்டாகும் அசுப பலன் காணாமல் போகும். பெரியோரின் ஆதரவு உண்டாகும். வேண்டுதலை நிறைவேற்ற கோயில்களுக்கு செல்வீர்கள்.  வியாபாரத்தில் லாபம் அதிகரிக்கும். சிலருக்கு காதல் அரும்பும். வாழ்க்கைத்துணையை இழந்தவர்களுக்கு மறுமணம், புதிய உறவு அமையும். வாழ்வில் புதிய பாதை தெரியும். 

பொதுப்பலன்

அவிட்டம் 1, 2ம் பாதத்தினருக்கு மே11 வரை குருவும், அதன்பின் அவரது பார்வைகளும், 2026 மார்ச் 6 முதல் சனியும், 3, 4 ம் பாதத்தினருக்கு மே 11 முதல் குருவின் சஞ்சாரமும், பார்வைகளும், இருவருக்கும் செவ்வாயின் 3,6,11 ம் இட சஞ்சாரமும், சூரியனின் 3,6,10,11 ம் இட சஞ்சாரமும் சாதகத்தை உண்டாக்கும் என்பதால்  உங்கள் நிலை உயரும். எடுத்த வேலைகள் வெற்றியாகும். வருமானம் அதிகரிக்கும். அந்தஸ்தும் செல்வாக்கும் உயரும். வாழ்வில் புதிய பாதை தெரியும்.

தொழில்: தொழிலில் ஏற்பட்ட தடைகள் விலகும். உங்கள் திறமை வெளிப்படும். இடையில் தடைபட்டிருந்த தொழிலை மீண்டும் கையில் எடுப்பீர்கள். ரியல் எஸ்டேட், பில்டர்ஸ், மெடிக்கல், கெமிக்கல், உணவகம், இயந்திரத்தொழில், வாகன உற்பத்தி, ஆட்டோ மொபைல்ஸ், டிராவல்ஸ், எலக்ட்ரானிக்ஸ், விவசாயம், பங்கு வர்த்தகம், பேன்சி ஸ்டோர், மினரல் வாட்டர், கூல்டிரிங்ஸ், பெட்ரோலியம், அழகு சாதனங்கள், கற்பித்தல், போதித்தல், வாதாடுதல், பலன் உரைத்தல், சினிமா, டி.வி. தொழில்கள் முன்னேற்றமடையும்.

பணியாளர்கள் ராகு கேது சஞ்சாரம் சாதகமாக இல்லை என்றாலும் குருவின் சஞ்சாரங்களும், பார்வைகளும் உங்களைப் பாதுகாக்கும். வேலைப் பார்க்கும் இடத்தில் உங்கள் செல்வாக்கு உயரும். எதிர்பார்த்த ஊதியமும் சலுகைகளும் கிடைக்கும். அரசு பணியில் இருப்பவர்களுக்கு மேல் அதிகாரியின் ஆதரவு உண்டாகும். எதிர்பார்த்த பதவி உயர்வும் இடமாற்றமும் கிடைக்கும் என்றாலும் இக்காலத்தில் வேலையில் நேர்மையாகவும் கவனமாகவும் இருப்பது அவசியம்.

பெண்கள் 

படிப்பு, திருமணம், மறுமணம் என கனவு நனவாகும். சிலர் புதிய தொழில் தொடங்குவர். வேலைத் தேடுபவர்களுக்கு கவுரவமான வேலை கிடைக்கும். பணியாளர்களுக்கு எதிர்பார்த்த உயர்வு உண்டாகும். பொன், பொருள், புகழ் சேரும். மனதில் இருந்த இறுக்கம் காணாமல் போகும். கணவருடன் இணக்கம் உண்டாகும். சுய தொழில் முன்னேற்றமடையும்.

கல்வி: 

படிப்பின் மீது அக்கறை அதிகரிக்கும். நண்பர்கள் உங்களை ஊக்கப்படுத்துவர்/ பொதுத் தேர்வில் வெற்றி உண்டாகும். உயர் கல்விக்காக மேற்கொள்ளும் முயற்சி நிறைவேறும். விரும்பிய கல்லுாரியில் இடம் கிடைக்கும்.

உடல்நிலை

சனி, ராகு, கேது சஞ்சார நிலைகள் எதிர்மறையாக இருப்பதால் உடல்நலனில் கவனமாக இருப்பது அவசியம். பரம்பரை வியாதிகளும், தொற்று நோய்களும் பாரம்பரிய மருத்துவத்தால் குணமாகும். இயந்திரப் பணியில் ஈடுபடும்போதும், வாகனத்தை இயக்கும்போதும் மிக கவனம் தேவை.

குடும்பம்

குரு சஞ்சாரமும், பார்வைகளும் சாதகமாக இருப்பதால் குடும்பத்தில் உண்டான குழப்பங்கள் இருந்த இடம் தெரியாமல் போகும். தம்பதிக்குள் ஒற்றுமை உண்டாகும். ஒருவரை ஒருவர் புரிந்து செயல்படுவீர்கள். குடும்ப நலனில் அக்கறை அதிகரிக்கும். புதிய சொத்து, வாகனம் என வாங்குவீர்கள். குடும்பத்தில் சுபநிகழ்ச்சி நடக்கும். உறவினர் மத்தியில் செல்வாக்கு உயரும்.

பரிகாரம்: காளத்தி காளத்தியப்பரை வழிபட்டுவர சங்கடம் விலகும்.