மதுரை: மதுரை மீனாட்சி அம்மன் கோயிலில் ஐப்பசி மாத திருவிழாவையொட்டி, அக்.,24ம் தேதி கந்தசஷ்டி உற்சவம் துவங்குகிறது. இத்திருவிழாவையொட்டி, தீபாவளியன்று காலை, மாலை இருவேளையிலும், மீனாட்சி அம்மனுக்கு வைரக்கிரீடம், தங்கக்கவசம், சொக்கநாதருக்கு வைர நெற்றிப்பட்டை, சாத்துப்படி செய்யப்படுவதுடன், சிறப்பு தரிசனமும் நடைபெறும். கோலாட்ட உற்சவம் அக்.,23 முதல் 29 வரை நடக்க உள்ளது. அக்.,24 முதல் 27 வரை மாலை 6 மணிக்கு, மீனாட்சி அம்மன் ஆடிவீதியில் எழுந்தருளி, பின் நாயக்கர் மண்டபத்தில் கொலுச்சாவடி சேத்தியாகும்.அக்., 28 மாலை 6.30 மணிக்கு மீனாட்சி அம்மன் வெள்ளி கோ ரதத்தில் எழுந்தருளி, ஆவணிமூலவீதியில் திருவீதி உலா வருவார். அக்.,29ல் மீனாட்சி சுந்தரேஸ்வரர், பஞ்சமூர்த்திகளுடன் வெள்ளி ரிஷப வாகனத்தில் அலங்காரமாகி, ஆடி வீதியில் புறப்பாடாகி வருவார்.

கந்தசஷ்டி விழா: அக்.,24 முதல் 30 வரை கந்தசஷ்டி உற்சவம் நடைபெறும். அக்.,30ம் தேதி காலை 7 மணிக்கு கூடல்குமாரருக்கு வெள்ளிக்கவசம்(பாவாடை) சாத்துப்படியும், விசேஷ அபிஷேகம், அலங்காரம், சண்முகார்ச்சனை நடைபெறும். நவ.,16ல் ஐப்பசிபூரம் நடைபெற உள்ளது. அன்று காலை 10 மணிக்கு மூலஸ்தான மீனாட்சி அம்மனுக்கும், உற்சவர் அம்பாளுக்கும் ஏத்தி, இறக்குதல் சடங்குகள், தீபாராதனை நடைபெறும். அக்.,22 முதல் 30 வரை உபயதாரர்கள் சார்பில் உபய திருக்கல்யாணம், தங்கரத உலா போன்ற சேவைகள் நடத்தப்படுவதில்லை. விழா ஏற்பாடுகளை தக்கார் கருமுத்து கண்ணன், நிர்வாக அதிகாரி நடராஜன் செய்து வருகிறார்.