நகரி: நகரி விநாயகர் கோவிலில், நேற்று முன்தினம் இரவு, பார்வேட்டை திருவிழாவில், 21 உற்சவர்கள் சந்திப்பு விழா நடந்தது. இதில், 40 ஆயிரத்திற்கும் மேற்பட்ட பக்தர்கள் கலந்து கொண்டு வழிபட்டனர்.

சித்துார் மாவட்டம், நகரி மண்டபம் அருகே, வழித்துணை வருவாய் விநாயகர் கோவில் உள்ளது. இக்கோவில் வளாகத்திற்கு, நாராயணவனம் அடுத்த, சீலகரம் அகத்தீஸ்வரர் மற்றும் திருத்தணி முருகன் கோவிலின் துணை கோவிலான கரீம்பேடு நாததீஸ்வர் ஆகிய உற்சவர்கள் சிறப்பு அலங்காரத்தில், கிழக்கு பாலமங்கலம், எளாக்காட்டூர், இருகுவாய், காகவேடு மற்றும் நகரி வழியாக, 15 கி.மீ., துாரம் வீதியுலா வந்து, நேற்று முன்தினம், இரவு, 10:30 மணிக்கு, வந்தடைந்தார்.

தொடர்ந்து, நகரி டவுனில் உள்ள கரகண்டேஸ்வரர், தேசூர் அகரம் சிவன், கிருஷ்ணாராமாபுரம் கைலாசநாதர், சத்திரவாடா சிதம்பரேஸ்வரர், சிந்தால்பேட்டை செல்வ விநாயகர், சரவணா விநாயகர், பாலமங்கலம் பாலீஸ்வரர், நகரி அடுத்த புங்கை காசிநாததீஸ்வரர் உட்பட 19 கிராமங்களில் இருந்து உற்சவ சுவாமிகள் சிறப்பு அலங்காரத்தில் நகரி மண்டபம் விநாயகர் கோவிலுக்கு வந்தனர். பின்னர், 21 உற்சவ சுவாமிகளுக்கும் சிறப்பு தீபாராதனை நடந்தது. இந்த நிகழ்ச்சியில், சென்னை, திருப்பதி, திருத்தணி, புத்துார், நாராயணவனம், நகரி, கரீம்பேடு, பள்ளிப்பட்டு மற்றும் அதை சுற்றியுள்ள கிராமங்களில் இருந்து, 40 ஆயிரத்திற்கும் மேற்பட்ட பக்தர்கள் வந்து சுவாமியை வழிபட்டனர்.