சபரிமலை:மாத பூஜைகளுக்காக, சபரிமலை அய்யப்பன் கோவில் நடை, வரும் 16ம் தேதி மாலை திறக்கப்பட்டு, வரும் 21ம் தேதி அடைக்கப்படுகிறது.ஆடி மாத பூஜைகளை முன்னிட்டு, வரும் 16ம் தேதி, மாலை, 5.30 மணிக்கு, மேல்சாந்தி சசி நம்பூதிரி நடையை திறக்கிறார். மறுநாள் காலை, கணபதி ஹோமத்துடன், வழக்கமான பூஜைகள் துவங்கும்.ஆடி மாதம் முதல் தேதி (17ம் தேதி) முதல், மாத பூஜைகள் தவிர, சிறப்பு பூஜைகளான படி, உதயாஸ்தமன பூஜைகள், நெய் அபிஷேகம் ஆகியவை, ஐந்து நாட்கள் தொடர்ந்து நடக்கும். பூஜைகள் முடிந்து, வரும் 21ம் தேதி, இரவு 10 மணிக்கு நடை அடைக்கப்படும்.நிறப்புத்தரி உற்சவம்: ஒவ்வொரு ஆண்டும் விவசாயிகள், தங்கள் நிலங்களில் விளைந்த புதிய நெற்கதிர்களை அய்யப்பனுக்கு படைப்பது வழக்கம். இது, "நிறப்புத்தரி உற்சவம் என அழைக்கப்படுகிறது. அதேபோல், இவ்வாண்டுக்கான உற்சவம், வரும் ஆக., 5ம் தேதி அதிகாலை, 5.30 மணி முதல், 6.45 மணிக்குள் நடக்க உள்ளது.இதை முன்னிட்டு, ஆக., 4ம் தேதி மாலை, 5.30 மணிக்கு நடை திறக்கப்பட்டு, அன்று இரவு, 10 மணிக்கு மீண்டும் அடைக்கப்படும்.