தர்மபுரி : தர்மபுரியை அடுத்த பெரியாம்பட்டி பூலாம்பட்டி ஆற்றங்கரையில் உள்ள குருமன்ஸ் இன மக்களின் குல தெய்வமான ஸ்ரீவீரபத்திர சுவாமி மற்றும் ஸ்ரீ சித்தப்ப சுவாமி கோவில் விழா நடந்தது. இதையொட்டி கடந்த 12ம் தேதி அதிகாலை 4 மணிக்கு புதிதாக கட்டப்பட்ட ஸ்ரீ சித்தப்ப சுவாமி கோவிலில் கும்பாபிஷேகம் நடந்தது. காலை 7 மணிக்கு கங்கனம் கட்டுதல் நடந்தது. நேற்று முன்தினம் காலை 9 மணிக்கு முருக்கம்பட்டியில் இருந்து சித்தப்ப சுவாமி அலங்கரித்து பூஜைகள் நடந்தது. மாலை 5 மணிக்கு முருக்கம்பட்டியில் இருந்து ஸ்வாமி பூலாப்பட்டி காட்டு கோவிலுக்கு சென்றடைந்தது. இரவு 8 மணிக்கு சேவாட்டம், 10 மணிக்கு வான வேடிக்கை நடந்தது. நேற்று அதிகாலை 5 மணிக்கு சித்தப்ப சுவாமிக்கு கங்கை பூஜையும், சுவாமி அலங்கரித்தலும் நடந்தது. காலை 9 மணிக்கு பக்தர்கள் தலைமீது தேங்காய் உடைத்து நேர்த்திக்கடன் செலுத்துதலும், குழந்தைகளுக்கு பெயர் சூட்டுதல், தலைமுடி வாங்குதல் ஆகியவை நடந்தது. பின்னர் பக்தர்களுக்கு அன்னதானம் நடந்தது. ஏற்பாடுகளை கோவில் நிர்வாகிகள், தர்மகர்த்தாக்கள் உதவி தர்மகர்த்தா, பூசாரிகள் சித்தன், சின்னசாமி ஆகியோர் செய்திருந்தனர்.