இது குறித்து, மத்திய உள்துறை அமைச்சகம், மாநிலங்கள், யூனியன் பிரதேசங்களுக்கு கடிதம் அனுப்பியுள்ளது. அதில் கூறப்பட்டுள்ளதாவது:வரும் நாட்களில், மத விழாக்கள் வர உள்ளன. இதையொட்டி, மக்கள் ஒன்று கூடுவதையும், பேரணியாக செல்வதையும் அனுமதிக்க கூடாது. ஊரடங்கு உத்தரவை கண்டிப்பாக அமல்படுத்த வேண்டும். இதுவரையிலான ஊரடங்கு காலத்தில், விவசாய பணிகளுக்கும், அது தொடர்பான இயந்திரங்கள், உதிரிபாகங்கள் விற்பனைக்கும் விலக்கு அளிக்கப்பட்டுள்ளது. மேலும், தோட்டப் பயிர், பெட்ரோல் பங்கு, தேயிலை தொழில், வாகன பழுது பார்ப்பு துறைகளுக்கும் விலக்கு தரப்பட்டுள்ளது. அத்தியாவசிய பொருட்கள் விற்பனை மற்றும் போக்குவரத்துக்கு அனுமதி வழங்கப்பட்டுள்ளது. இந்நிலையில், மேலும் எந்தெந்த துறைகளுக்கு ஊரடங்கில் இருந்து விலக்கு அளிக்கலாம் என்பது பற்றி, மாநிலங்களும், யூனியன் பிரதேச அரசுகள் தெரிவிக்க வேண்டும். இவ்வாறு அதில் கூறப்பட்டுள்ளது. இதற்கு, பீஹார் உள்ளிட்ட சில மாநிலங்கள் பதில் அனுப்பியுள்ளன. அதில், கிராமப்புறங்களில் கட்டுமான பணிகள் மேற்கொள்ள அனுமதிக்க வேண்டும் என்பது உள்ளிட்ட அம்சங்கள் இடம் பெற்றுள்ளன.