மைசூரு; கெல்லஹள்ளி கிராமத்தில் உள்ள அய்யப்ப பக்தர்கள், கொதிக்கும் எண்ணெயில் கை விட்டு அதிரசத்தை எடுத்தனர்.

மைசூரின், கெல்லஹள்ளி கிராமத்தில் பலரும் சபரிமலைக்கு சென்று அய்யப்ப சுவாமியை தரிசிக்க மாலை போட்டுள்ளனர். நேற்று முன்தினம் மண்டல பூஜை நடத்தினர். கிராமத்தின் மூகு மாரம்மா கோவில் வளாகத்தில் கணபதியை பூஜித்து, மண்டல பூஜையை துவக்கினர். மதியம் 12:00 மணிக்கு, அன்னதானம் ஏற்பாடு செய்தனர். சுற்றுப்புற கிராமங்களின் 80,00 பேருக்கு அன்னதானம் வழங்கினர். இரவு 8:00 மணிக்கு அய்யப்ப சுவாமி, கணபதி, சுப்ரமண்யர், மாளிகை புரத்தம்மன், விஷ்ணுவின் போட்டோக்கள் வைத்து, அய்யப்ப சுவாமியின் 18 படிகள் அமைத்து பூஜை செய்தனர். இரவு 11:00 மணிக்கு, கொதிக்கும் எண்ணெயில் கை விட்டு அதிரசங்களை எடுக்கும் நிகழ்வு நடந்தது. அய்யப்ப பக்தர்கள் கொதிக்கும் எண்ணெயில் கை விட்டு அதிரசத்தை எடுத்தனர். அதன்பின் தீ மிதி திருவிழா நடந்தது. மாலை அணிந்தவர்கள், பக்தியுடன் தீ மிதித்தனர். நேற்று அதிகாலை 3:00 மணி வரை, பூஜைகள் நடந்தன.