பெங்களூரில் வரலாற்று பிரசித்தி பெற்ற கோவில்களுக்கு பஞ்சம் இல்லை. ஒவ்வொரு பகுதியிலும், புராதன கோவில்களை தரிசிக்கலாம். அம்பாள் கோவில்களும் உள்ளன. இவற்றில் நாகம்மா கோவிலும் ஒன்று.

பெங்களூரு மடிவாளா பி.டி.எம்., முதல் ஸ்டேஜில் நாகம்மா கோவில் அமைந்துள்ளது.

சக்தி வாய்ந்த பெண் தெய்வமான நாகம்மா, இங்கு குடிகொண்டு பக்தர்களுக்கு அருள்பாலிக்கிறார். பெரிய அரச மரத்தின் நிழலில், அமைதியான சூழலில் கோவில் அமைந்திருப்பது, கோவிலின் மற்றொரு சிறப்பாகும். இங்கு வந்து அம்பாளை தரிசனம் செய்தால், மனதில் அமைதியும், நிம்மதியும் ஏற்படும்.

பெங்களூரின் பழமையான கோவில்களில் இதுவும் ஒன்றாகும். நகரின் பல்வேறு பகுதிகளில் இருந்தும் பெருமளவில் பக்தர்கள் வருகின்றனர். குறிப்பாக செவ்வாய், வெள்ளிக்கிழமைகள், அமாவாசை, பவுர்ணமி நாட்களில், பக்தர்கள் எண்ணிக்கை அதிகம் இருக்கும். பெயருக்கு தகுந்தார் போன்று நாக தோஷத்தை நீக்குவதில், நாகம்மா பிரசித்தி பெற்றவர்.

இங்கு வந்து அம்பாளை தரிசித்து, மனமுருக பிரார்த்தனை செய்தால், தோஷம் நிவர்த்தியாகும் என்பது ஐதீகம்.

நாக தோஷத்தால் திருமணம் தடை பட்டால், திருமணமாகி பல ஆண்டுகளாகியும் குழந்தை இல்லாத தம்பதியர், நாகம்மா கோவிலுக்கு வந்து வேண்டினால் திருமணம் கைகூடும். குழந்தை வரம் கிட்டும். இதனால், தொலைவில் உள்ள ஊர்களில் இருந்தும் பக்தர்கள் வருகின்றனர்.

ஆண்டுதோறும் இந்த கோவிலில் கோலாகலமாக திருவிழா நடக்கிறது. அதில் ஆயிரக்கணக்கான பக்தர்கள் பங்கேற்பர். நவராத்திரி, தீபாவளி போன்ற பண்டிகைகளின் போது, கோவிலில் சிறப்பு பூஜைகள் நடக்கும்.

ஆடி மாதம் கூழ் வார்க்கப்படும். வளமான வாழ்க்கையை விரும்புவோர், ஒரு முறை நாகம்மாவை தரிசனம் செய்யுங்கள்.