பெங்களூரு ரூரல் மாவட்டம், தொட்டபல்லாபூர் தாலுகா மகாலிதுர்கா கிராமத்தில், மகாலிதுர்கா மலை உள்ளது. கடல் மட்டத்தில் இருந்து 3,664 அடி உயரத்தில் உள்ள இந்த மலையின் உச்சியின் சிவனுக்கு அர்ப்பணிக்கப்பட்ட மல்லேஸ்வரா சுவாமி கோவில் அமைந்துள்ளது.

இக்கோவிலின் ஆன்மிக வரலாறு பல ஆண்டுகள் பழமையானது. ஹிந்து புராணங்களின்படி, மார்க்கண்டேய முனிவர் இந்த மலையின் அமைதியான சூழலால் ஈர்க்கப்பட்டு, இங்கு தீவிர தவம் செய்துள்ளார்.

அவரது தவத்தால் மெச்சிய சிவபெருமான் இங்கு மல்லேஸ்வரராக அதாவது சுயம்பு வடிவ லிங்கமாக காட்சி தந்து அருள்பாலித்தார் என்று நம்பப்படுகிறது.

மலையின் உச்சியில் சித்தர்களும், முனிவர்களும் தவம் செய்த அதிர்வுகள் இன்னும் நிலவுகிறது என்றும், வாழ்க்கையில் ஏற்படும் கடுமையான தோஷங்கள் நீங்கவும், நீண்ட ஆயுள் பெறவும் மல்லேஸ்வரரை வழிபடுவது உகந்தது என்றும் பக்தர்கள் நம்புகின்றனர்.

இக்கோவில் மிகவும் எளிமையாக உள்ளது. விஜயநகர பேரரசர் காலத்து கட்டட கலையை கொண்டது. கருவறையில் பழமையான சிவலிங்கம் உள்ளது. கோவிலுக்கு அருகிலேயே பாறையை குடைந்து உருவாக்கப்பட்ட இயற்கையான குளம் உள்ளது. இந்த குளத்தின் தண்ணீரை கொண்டே, மல்லேஸ்வரருக்கு தினமும் சிறப்பு அபிஷேகம் செய்யப்படும்.

மலையின் அடிவாரத்தில் கிருஷ்ணர் கோவில் உள்ளது. பக்தர்கள் முதலில் கிருஷ்ணரை வணங்கி விட்டே மலையேற துவங்குகின்றனர்.

வயதானவர்கள் மலை ஏற முடியாது என்பதால் அடிவாரத்தில் இருந்தே உச்சியில் உள்ள கோவிலை தரிசிக்கலாம். மலையேறி செல்வோர் உச்சியை அடைய இரண்டு மணி நேரம் ஆகலாம். சொந்த வாகனத்தில் செல்வோர், அடிவார பகுதியில் நிறுத்தி செல்லலாம்.