செஞ்சி:பாரம்பரியம் மிக்க செஞ்சி கமலக்கன்னியம்மன் கோவில் தேர் திருவிழா நாளை நடைபெற உள்ளது. செஞ்சிக்கோட்டை ராஜகிரி மலை மீதுள்ள கமலக்கன்னியம்மன், ராஜகாளியம்மன், மாரியம்மன், கோட்டை வீரனுக்கு பல நூறு ஆண்டுகளாக தேர் திருவிழா நடத்தி வருகின்றனர். இந்த ஆண்டு தேர் திருவிழா கடந்த 13ம் தேதி கொடியேற்றி, காப்பு கட்டி துவங்கினர். தினமும் அம்மனுக்கு பொங்கல் வைத்து சிறப்பு அபிஷேகம் செய்தனர். இரவு சாமி வீதி உலா நடந்து வருகிறது. நாளை (21ம் தேதி) பகல் 1: 30 மணிக்கு திருத்தேர் வடம் பிடித்தல் நிகழ்ச்சி நடக்கிறது. இதை முன்னிட்டு காலை 6 மணிக்கு 1008 பால் குடம் ஊர்வலமும், 10 மணிக்கு மாரியம்மன் கோவிலில் கூழ்வார்த்தல் நிகழ்ச்சியும் நடக்கிறது. விழா ஏற்பாடுகளை அறங்காவலர் ஏழுமலை மற்றும் உபயதாரர்கள், கிராம பொதுமக்கள் செய்துள்ளனர். விழாவை முன்னிட்டு கடந்த 13ம் தேதி முதல் ராஜகிரி கோட்டைக்கு சென்று வருவதற்கு இந்திய தொல்லியல் துறையினர் இலவச அனுமதி வழங்கி உள்ளனர்.