எல்லாரையும் மதித்து நடக்கும் கன்னி ராசி அன்பர்களே!

சுக்கிரன், சனி, கேது மாதம் முழுவதும் நற்பலனைக் கொடுப்பர். கேதுவால் பொருளாதார வளம் அதிகரிக்கும். பகைவர்களின் தொல்லையில் இருந்து விடுபடலாம். அபார ஆற்றல் பிறக்கும். புதன் பிப். 6 வரை சாதகமாக இருந்து பலன் தருவார். குடும்பத்தில் மகிழ்ச்சி அதிகரிக்கும். பிரிந்த தம்பதி ஒன்று சேருவர். குழந்தை பாக்கியம் கிடைக்கும்.

தொழில், வியாபாரத்தில் மறைமுக போட்டியாளர்களால் இடையூறு வரலாம். ஆனால் பணவரவு திருப்திகரமாக இருக்கும். அரசு வகையில் அனுகூலமான போக்கு காணப்படவில்லை. எனவே வரவு-செலவு கணக்கை சரியாக வைத்துக் கொள்ளவும். பிப். 9,10ல் பணவரவு அதிகம் இருக்கும். மனதில் மகிழ்ச்சி ஏற்படும். ஜன. 26,27,31ல் சந்திரனால் தடைகள் வரலாம். பிப். 6க்கு பிறகு அலைச்சல் அதிகரிக்கும். தொழில் ரீதியாகவெளியூர் பயணம் ஏற்படலாம். இந்த பயணங்கள் ஓரளவுக்கு வருமானத்தைக் கொடுக்கும்.

பணியாளர்களுக்கு அலுவலகத்தில் செல்வாக்கு அதிகரிக்கும். பதவிஉயர்வு கிடைக்கும். மேல் அதிகாரிகளின் ஆதரவும், சக ஊழியர்களின் ஒத்துழைப்பும் கிடைக்கும். ஜனவரி 21,22,23ல் எதிர்பாராத நற்பலன் கிட்டும். பிப். 6க்கு பிறகு வேலை காரணமாக சிலர் குடும்பத்தை பிரியலாம். வேலையில் அலைச்சலும் பளுவும் அதிகம் இருந்தாலும் மலைத்து விடாதீர்கள்.

கலைஞர்களுக்கு புதிய ஒப்பந்தம் கிடைக்கும். எதிர்பார்த்த புகழ், பாராட்டு வந்துசேரும்.

அரசியல்வாதிகள் பலனை எதிர்பாராமல் உழைக்க வேண்டி இருக்கும். நினைத்த பதவி கிடைப்பது தள்ளிப்போகும்.

மாணவர்கள் சிறந்த மதிப்பெண் கிடைக்கப் பெறுவர். போட்டிகளில் வெற்றிகாணலாம்.

விவசாயிகளுக்கு சுமாரான வருமானம் கிடைக்கும். காய்கறி, பழ வகைகள் நல்ல விளைச்சல் இருக்கும். வழக்கு விவகாரங்களில் மெத்தனமாக இருக்க வேண்டாம்.

பெண்களுக்கு கணவன் மற்றும் குடும்பத்தாரிடம் நற்பெயர் கிடைக்கும். ஜனவரி 15,16, பிப். 11,12ல் நகை வாங்கலாம். விருந்து, விழா என சென்று வருவீர்கள்.

நல்ல நாள்: ஜன. 15,16,21,22,23,24,25,28,29,30, பிப். 2,3,4,9,10,11,12.

கவன நாள்: ஜன 17,18, சந்திராஷ்டமம்

அதிர்ஷ்ட எண்: 4,6. நிறம்: வெள்ளை, சிவப்பு

பரிகாரம்: தினமும் காலையில் எழுந்து சூரியனை வணங்குங்கள். ராகு சாதகமற்ற இடத்தில் இருப்பதால் அவருக்கு உளுந்து படைத்து அர்ச்சனை செய்யுங்கள்.