ஜம்மு: அமர்நாத் பனி லிங்க தரிசன யாத்திரை, பலத்த பாதுகாப்புடன் நேற்று துவங்கியது.ஜம்மு - காஷ்மீரில், கவர்னர் ஆட்சி நடக்கிறது. இங்குள்ள அமர்நாத் குகையில், ஆண்டுதோறும், ஜூலை - ஆகஸ்ட் மாதங்களில் உருவாகும் பனி லிங்கத்தை தரிசிக்க, நாடு முழுவதிலும் இருந்து, லட்சக்கணக்கான பக்தர்கள் வருகின்றனர். கடந்த ஆண்டு, ௨.௬௦ லட்சத்துக்கும் அதிகமான பக்தர்கள், பனிலிங்கத்தை தரிசனம் செய்தனர்.

இந்த ஆண்டு, அமர்நாத் பனி லிங்கத்தை தரிசிப்பதற்கான முன் பதிவு, இரண்டு மாதங்களுக்கு முன் துவங்கியது. இரண்டு லட்சத்துக்கும் அதிகமானோர், முன் பதிவு செய்துள்ளனர். யாத்ரீகர்கள் தங்குவதற்காக, ஜம்முவில், அமர்நாத் மலையடிவார பகுதியான பார்வத் நகரில், முகாம் அமைக்கப்பட்டு உள்ளது.பனிலிங்கத்தை தரிசிப்பதற்கான முதல் குழு, நேற்று புறப்பட்டது. ௧௦௭ வாகனங்களில், ௧௨௦ துறவியர், ௨௧ குழந்தைகள், ௫௨௦ பெண்கள் உட்பட ௨,௯௯௫ பக்தர்கள், பலத்த பாதுகாப்புடன், நேற்று காலை புறப்பட்டனர். யாத்ரீகர்கள் குழு, பால்தால், பஹல்காம் பகுதியில் உள்ள முகாம்களை சென்றடையும். அங்கிருந்து இரண்டு குழுக்களாக பிரிந்து, பனி லிங்கத்தை தரிசிக்க, பாத யாத்திரையாக செல்வர். யாத்திரையை, கவர்னரின் ஆலோசகர்கள், பி.பி.வியாஸ், கே. விஜயகுமார் ஆகியோர், கொடியசைத்து துவக்கி வைத்தனர்.விஜயகுமார் கூறுகையில், அமர்நாத் யாத்திரை, மிகவும் முக்கியமான நிகழ்வு. நாடு முழுவதிலும் இருந்து, பனி லிங்கத்தை தரிசிக்க பக்தர்கள் வருகின்றனர். ஜம்மு -காஷ்மீரின் கவுரவ அடையாளமாக, அமர்நாத் யாத்திரை திகழ்கிறது, என்றார்.