பண்ருட்டி : பண்ருட்டி அடுத்த திருவதிகை சரநாராயண பெருமாள் கோவிலில் திருபவித்ர உற்சவத்தில் உற்சவர் பெருமாள் உபயநாச்சியாருடன் சிறப்பு அலங்காரத்தில் பக்தர்களுக்கு அருள்பாலித்தார்.

கடலுார் மாவட்டம், பண்ருட்டி அடுத்த திருவதிகை சரநாராயண பெருமாள் கோவிலில் திருபவித்ர உற்சவம் கடந்த 3ம் தேதி துவங்கியது. நேற்று முன்தினம் மாலை உற்சவர் பெருமாள் உபயநாச்சியாருடன் ஊஞ்சல் உற்சவத்தில் பக்தர்களுக்கு அருள்பாலித்தார்.நேற்று பவித்ர உற்சவத்தின் நிறைவு நாளையொட்டி காலை 7:00 மணிக்கு அக்னி ஆராதனை, நித்ய ஹோமம், 9:00 மணிக்கு அஷ்டோத்தர சத 108 கலச திருமஞ்சனம் நடந்தது. காலை 11:30 மணிக்கு மகாபூர்ணாஹூதி, கடம் புறப்பாடாகி வேதபிரபந்த சாற்றுமறை நடந்தது. மாலை 6:30 மணிக்கு உற்சவர் பெருமாள் உபயநாச்சியாருடன் உள்புறப்பாடாகி, சிறப்பு அலங்காரத்தில் பக்தர்களுக்கு அருள்பாலித்தார். விழாவில் முககவசம் அணிந்து பக்தர்கள் சுவாமியை தரிசனம் செய்தனர்.